Nongpoh, Jylliew 04: Ka Shillong Archidiose Catholic Youth Movement lyngba ka Social & Cultural Committee kala rakhe lypa ïaka sngi kyrpang ban pynneh pynsah ïaka Mei Mariang ha ka jingïatrei ryngkat bad ka St. Michael Hr. Sec. School bad ka Balawan College, Umsning ïa kaba la pynlong ha Ka ïing skul Jong ka St. Michael Hr. Sec. School, Umsning.
Ha kane ka sngi la wan ban ïa don lang da u Dr. Celestine Lyngdoh, MLA ka Umsning Constituency kum u Kongsan, ha ka jingïadon ryngkat lang u bah Albert Sngi Lyngdoh, Senior Manager & Training Specialist of Excellence naka tnad NRM Meghalaya Basin Development Authority, Fr. Lawrance Kharluni, Principal Balawan College, Aidalyne Sohklet, Principal St. Michael Hr. Sec. School, Fr. Pius Shadap, Parish Priest Umsning, Ki nonghikai, ki khynnah skul ki dkhot ka SACYM bad kiwei kiwei.
Kum shibynta ban pynneh ïa ka mei Mariang, ki nongpynïaid ki la pynlong ruh da ka jingthung ïa ki tynrai dieng ha katei ka jaka ha kaba la ïashimbynta lang da ki kongsan kiba la wan ha katei ka program, ki khynnah skul lem bad ki nonghikai.
Haba ai jingkren kum u kongsan, u Dr. Celestine Lyngdoh u la pynpaw ia ka jingkmen ban ia donlang ha kum kane ka prokram kaba kongsan bad kaba ia dei bad ka jingkordor ban ri ban sumar ia ka mei mariang lane ka World Environment Day, da kaba ai khublei kyrpang ruh ia ki nongpyniaid halor ka jingshimkhia kaba jong ki ban kynmaw bad ban pynkynmaw ia ki samla pule kumno ban don ka jingkitkhlieh kaba man ka sngi na ka bynta ka mei mariang.
“Ka jingkitkhlieh ban sumar ia ka mei mariang lane ka prokram thung dieng kam dei tang shisien shisnem lane tang ha kata ka Tarik ba rakhe ia ka World Environment Day, hynrei kum ki nongshong shnong ngi dei ban kynmaw ba ngin sumar ia ka mei mariang ia ki sawdong sawkun man ka sngi bad ban rai kumno ban shim jingkitkhlieh ban pynneh pynsah ia ka jingjyrngam jong ka mariang ban lait na ka jingkylla kaba syndet jong ka suin bneng khamtam ka jingduna ka jinghap slap kane ka dei hi ka jingkylla jong ka suinbneng”, ong u Dr. Celestine Lyngdoh.
Ïa katei ka program la pynphuh pynphieng ruh da ki jingpud jingtem bad jingrwai naka Singing Committee Jong ka SACYM.
