Shillong, Naiwieng 02: Ki riewngeit Catholic ha kylleng ka jylla Meghalaya hynne ka sngi u Blei kila rakhe ia ka All Souls’ Day ne ka sngi kaban kynmaw burom ia kiba la khlad noh.
Ki riewngeit kila leit sha ki lum jingtep kiba don ha ka nongbah Shillong, Tura, Williamnagar bad Nongpoh ban kynmaw burom ia la ki baieid bathoin kiba la khlad noh da kaba buh jingduwai, ka Mass Bakhuid bad ka jingthang ia ki mombati.
Ha Shillong, la pynlong ia ka Mass kaba kyrpang ha u lum jingtep ka Balang Catholic da u Most Rev. Archbishop Victor Lyngdoh. Ki bahaiing bahasem bad ki paralok ki parajor kila leit ban buh syntiew ha lum jingtep bad thang ia ki mombati, buh jingduwai na ka bynta ka mynsiem jong kine kiba la khlad noh.
Ha Nongpoh, ki riewngeit Catholic kila rakhe iaka All Souls’ Day da kaba leit buh syntiew bad buh jingduwai kyrpang ha u lum jingtep ka Balang Catholic kaba don ha Nongpoh kum ka dak jong ka jingkynmaw iala ki baieid bathoin kiba la khlad noh.
Ha kane ka sngi kala don ruh ka jingleh iaka Mass kaba kyrpang ha lum jingtep, ia kaba la pyndep da u Fr Raphael Risterland Maiong bad hadien kane ula shim ïaka bynta ban synreit da ka um kyrkhu ïa u Lum jingtep.
Ha u lum jingtep ha Tura, u Most Rev. Andrew R. Marak, Bishop ka Tura, ula ialam ia ka Mass Bakhuid, ha kaba ki riewngeit kila wan bun ngut bha, ban buh jingduwai, thang mombati bad ban rwai ia ki jingrwai niam kum ka dak ban kynmaw burom ia kito kiba la khlad noh.
U Bishop Marak ula kyntu ia ki riewngeit ba kidei ban pynkhlain ia ka jingngeit ka jongki ha ka jingmih pat bad ban im ia ka jingim kaba don ia ka jingkyrmen bad kaba noh ia u synniang.
Wat hapdeng ka jingjur u slap bad ka jingktieh, ki riewngeit Catholic ka Williamnagar kila ialum ha u lum jingtep jongka Balsrigittim Catholic Cemetery ha kaba u Fr. John Thomas, Parish Priest jongka Sacred Heart Church ula ialam ia ka Mass Bakhuid ha ryngkat ka jingdonlang kiwei kiwei ki phadar bad ki sister katei ka thain.
U Fr. Thomas ula pynpaw ia ka jingkongsan jong kane ka sngi bad pynkynmaw ia ki riewngeit “Ba kin iai kynmaw ha ka jingim ia ki jingsah jingkynmaw ia kito kiba la khlad noh lyngba ka jingngeit, jingduwai bad ka jingieid”.
Haiden ka Mass, u nongialam niam ula leit ban jngoh ia man la ki jaka tep bad kyrkhu ia ki da kaba synreit da ka um khuid.
Ka All Souls’ Day kadei kaba kit jingmut bha ia ki riewngeit Catholic ha ka pyrthei baroh kawei. Kadei ka sngi ban kynmaw burom bad ban buh jingduwai kyrpang na ka bynta baroh ki riewngeit kiba la khlad noh, kaba ai iaka lad ia ki bahaiing bahasem ba kin kynmaw iala ki baieid bathoin bad ban aiti ia ki ha ka jingmap ei jong u Blei.
