Shillong Jylliew 23: Ka Meghalaya & Greater Shillong Progressive Hawkers and Street Vendors Association (MGSPHSVA), ka seng bah ki nongdie madan ha ka sngi Palei ka la pynlong ia ka jingrakhe ia ka lyngkhuh snem kaba hynriew ha Anton Hall, Don Bosco Square Laitumkhrah Shillong.
Ha kane ka jingrakhe la їa don lang I Kong D.B.S Mukhim, iba long I Assistant Food Commissioner ka Sorkar Jylla bad ruh I Kong Wanpynhun Kharsyntiew kum ki nongshah khot sngewbha bad ki kongsan.
Palat hajar ngut ki nongdie madan kiba long ruh ki dkhot jong ka MGSPHSVA ki la poi sha kane ka jingrakhe. Kane ka jingleh kmen ha ka lyngkhuh snem ka don ar bynta, kawei ka jingїalang kaba lyngkot kaba la sdang ha ka por mynstep bad kaba ar ka dei ka jingleh sngewbha bad ki rong birria bapher ban lehkmen .
La pynlong ia ka jingїakop shad bad jingpyni talent bad la sam ia ki khusnam sha ki nongjop.
La pynїaid ia ka jingїalang ha ka bynta ba nyngkong da I Kong Biolin Pyrtuh, President ka seng bad I kong Theresia Kharsyntiew I Vice President I la ai ka jingkren pdiang.
Ha ka jingkren jong I Kong Mukhim I la ong, “Ki nongdie madan bad khamtam kiba die jingbam ki dei kiba leh khuid leh suba bad tap bha ia ki jingbam jong ki.” I la pyrto ruh ia ka seng MGSPHSVA kaba ju їatreilang bad ka tnad na ka por sha ka por.
Ha kajuh ka por ka MGSPHSVA ka ai burom ia i bad ka mana ia ki dkhot bad nongdie madan ba kim bit ban kren tohmet ia ki nongmihkhmat jong ka Sorkar haba ki kyntu bad pyni ia ki kyndon ba ki nongdie madan ki dei ban bud.
I Kong Wanpynhun I la ai ka jingkren kaba rhem tam bad ai jingkyrmen ha kaba I la kdew ia ki hok jong ki nongtrei nongbylla, kaba kynthup ia ki nongdie madan.
I la batai bniah ruh naduh ka koit ka khiah ka sumar pang, ka pule dangle, ka bai bam tymmen, ka reshon card bad kiwei. “Kine ki dei ki hok tynrai jong ki nongshong shnong, bad ngi dei ban dawa ba ki dei ban poi haduh tyngkong iing jong ngi ki nongtrei nongbylla,” i la ong.
Hadien ba la wai ka jingїalang kaba nyngkong la bteng pat sa ka shad ka kmen, ka rong biria kiba lai phew skit. Kane ka jingrakhe lyngkhuh snem mynta ka snem ka long ruh kaba kyrpang namar ka їahap bad ka jingjop jong ki Nongdie madan ha ka jingїakhun mukutduma jong ki na ka bynta ban pyntreiikam ia ka Central Act halor ki nongdiemadan.
Ha ka 22 Jylliew 2022, shi sngi shuwa ka sngi kyrpang Ka MGSPHSVA ka la pynlong ruh ia ka training halor ki jingpyniaid ia ki kam jong Seng, ki jingtip shaphang ki Ain bad kumno ban iatreikam ha ka imlang sahlang.
