Shillong, Lber 24: Ka District Health Society, West Jaintia Hills, Jowai hynne ka sngi kala rakhe ia ka World Tuberculosis Day ha Khimmusniang Indoor Sports Hall, Jowai halor ka mat “Yes! We can End TB.”
Ka Kong H.M.L Kynta, Additional Deputy Commissioner, West Jaintia Hills kum ka Kongsan kala pynkynmaw ia iwei pa iwei ia katei ka jingpang kabashyrkhei bad kala kyntu ia baroh ba dei ban don iaka jingkitkhlieh ha kaban tehlakam ia ka jingsaphriang kane ka jingpang.
Kala ong, ki briew kiba dei ki nongpang ia katei ka jingpang kidei ban shim ia ka bynta kaba khraw ha kaban iakhun ia katei ka jingpang da kaba dih ia ki dawai man la ka por bad kidei ban leit phah test ialade katkum ka jingbthah kaba ki iohi na ki doctor.
Kala pynpaw iaka jingsngewkhia halor ka jingpang Tuberculosis namar ba kadei kaba lah ban saphriang lyngba ka lyer bad kala kyntu ia ka imlang sahlang ba kidei ban iatreilang ban iakhun ia kane ka jingpang da kaba pynlong ia ki sawdong sawkun bad ia ka mariang kaba khuid bad haba ki ioh jingtip ba ki don ki briew kiba don ia ki dak ki shin jong ka jingpang TB, kidei ban ai jingmut ia ki ba kidei ban leit iakynduh noh mardor ia ki doctor.
Pule lang ia kane: Pynshai u CM ba pynsangeh u Lamphang ia ka Dorbar kat kum ka Rule
Ka Senior Medical & Health Officer, DTC, Jowai ka Dr. I Khyriem, kala pyntip ba ka World TB Day la rakhe haka 24 tarik u Lber khnang ba un pynsngewthuh ia ki paidbah shaphang katei ka jingpang bad kala pan iaka jingiatreilang na baroh ban pynduhjait ia kane ka jingpang kaba shyrkhei.
Dr. E B V Laloo, District Tuberculosis Officer, West Jaintia Hills la ai jingpynshai ia ki da ki shin jong ka jingpang TB bad pynkynmaw ia baroh ia ki lad ki lynti kiba lah ban shim kum ka jingiada na katei ka jingpang.
Ban pynsngewthuh ia ki paidbah shaphang kane ka jingpang, ka District Health Society (NTEP), West Jaintia HIlls kham haswa, kala pynlong iaka Rally, kaba la sdang na Madan Diamasi, Ladthadlaboh, Jowai ha kaba ki khynnah na ki skul bapher ka nongbah Jowai kila wan ban iashimbynta da kaba rah ia ki jingthoh bad ki postar kiba don ia la ki khubor jongki.
Lah ban kdew, ba ka District Health Society kala pynlong ruh iaka Street play ha Iawmusiang, Ladthadlaboh ha ka 17 tarik u Lber bad ha ka 22 tarik kala pynlong iaka jingialehkai Sports ha Panaliar Secondary School, Jowai.
La sam ia ki khusnam sha ki nongjop ha ki jingiakob bapher bad la sam ruh ia ka sertiphiket sha ki ASHA bad ki Nongtrei jong ka Medical and Health Office.
