Shillong, Iaiong 25: Ka jaka ri khunswet lane ka SOS Children’s Village Shillong kaba don ha Umiam hynne ka sngi kala rakhe iaka jingdap 25 snem.
Iaka SOS Children’s Village Shillong la seng ha u snem 1999 bad kane ka wan lyngba ka jingshim khia jong ka SOS Children Village’s India kaba la sdang treikam naduh u snem 1964 haki 31 tylli ki Jylla ka Ri.
Ka SOS Children’s Village Shillong kala sdang treikam tad haduh u snem 2000 daki 5 ngut ki kmie (Mothers) kiba ri bad sumar iaki 40 ngut ki khynnah na kylleng ka Jylla Meghalaya.
Haki 25 snem jong ka jingtreikam, ka SOS Children’s Village Shillong haduh mynta kala kdup bad ri ïa palat 350 ngut ki khynnah ha kaba bun na ki, kila ioh kam ioh jam bad don ruh kiba la ïeng hala ki jong ki kjat bad ban sdang iala ka jong ka iing ka sem.
Mynta ka kynti ka SOS Children’s Village Shillong ka kyrshan ïa 155 ngut ki khynnah haki 9 tylli ki longïing bad 2 tylli ki Youth Hostel ba sah ki shynrang bad ka kyrshan ruh iaki 65 ngut ki khynnah lyngba ka Supervised Independent Living (SIL).
Ka jingrakhe iaka jingdap 25 snem lane ka Silver Jubilee jong ka SOS Children’s Village Shillong kadei ruh kum shi bynta ban iakynduh lang baroh ki khynnah, ki Mothers, ki nongkyrshan, ki nongialam, ki nong synñiang bad ki khun samla kiba la ïeng hala ki jong ki kjat namar ka jingkyrshan jong kane ka jaka ri khunswet.
Ia kane ka jingrakhe la pynshongkun da u Myntri ka tnat Social Welfare u Bah Paul Lyngdoh haka jingdon lang u Sumanta Kar u CEO ka SOS India, Anuradha Abrol ka CPO Family Like Care, u Amar Jyoti Sarmah u Director ka SOS Children’s Village Shillong, ki Mothers, ki nongkyrshan, ki khynnah bad kiwei kiwei de ki nong shah khot sngewbha.
Haba kren ha kane ka sngi u Bah Paul u la ong “Ka long kaba jingkmen kaba khraw ban ïadon bynta ha kane ka jingrakhe ia ka jingdap Silver Jubilee jong ka SOS Children’s Village Shillong. Kane ka dak ka pyni ia ka jingtrei shitom bad ka jingiarap ba ka SOS Children’s Villages India ka ai sha ki khynnah ba duna ka jingkyrshan. Ka la kyntiew ym tang ia ka imlang sahlang hynrei ruh ia ka lawei jong ki. Nga ai khublei kyrpang ïa ki SOS Mothers, ki nongtrei bad ki nongkyrshan kiba la ïatreilang ban wanrah kane ka lawei ba skhem naka bynta ki khynnah”
U Bah Paul u la kyntu ruh iaki nongpyniaid ka SOS Children’s Village Shillong ba kin thoh sha ka Sorkar Jylla haba iadei bad ki jingdonkam ban pyntyllun iaki kam bad u la bynrap daka ba ong ba ka Sorkar lyngba ka tnat Social Welfare ka kloi ban kyrshan khnang ban pynthikna ba ki khynnah kin ioh ïa lawei ba skhem bad kaba phyrnai.
U la ong ba ka jingdon jong ka SOS Children’s Village Shillong kam dei tang ban ai jaka sah, ka bam ka dih iaki khynnah hynrei kadei ruh ka jaka ban ai jingieid, ïa kito ki bym shym la ioh ka lad ban mad ka jingieid naka kmie.
“Watla ki kmie kiba don ha kane ka jaka kim dei kiba pun ba kha iaki khynnah hynrei ka log kaei kaei kaba phyllaw ba ki lah ban ai shisha ka jingieid iaki khynnah kum ki khun lajong. Ngi dei ban ai ka burom kaba khraw iaki” u la ong.
Naka liang u CEO ka SOS India u Sumanta Kar u la ong “Mynta la palat 25 snem ka SOS Children’s Village Shillong ka la shim ia ka jingkular ba iwei pa iwei i khynnah kiba la duh noh ia ki kmie ki kpa lane kiba la jan duh ia ka jingsumar kin dang don ka lawei kaba phyrnai, kaba dap da ka jingieid bad kaba skhem”.
