Nongpoh, Nohprah 05: Ka skul Nongrim Byrnihat Presbyterian Secondary, hynne ka sngi Ba-ar, kala rakhe ia ka jingdap 25 snem ka skul ha ka jingiaid lynti ban pynsaphriang ia ka jingnang jingstad hapoh ka thain.
Ia kane ka jingrakhe la pynshongkun da ka jingiadonlang u MLA ka thain Bah Sosthenes Sohtun kum u kongsan ha ryngkat u MDC Bah Vicktor Rani, u Joint Director of School Education Bah Vincent Nianglang, u Rev PG Khongsdir bad ki bor pyniaid ka skul.
Haba kren kum u Kongsan, u Bah Sosthenes Sohtun ula pynpaw ia ka jingkmen ban iadon bynta lang ha kane ka sngi sah jingkynmaw jong kane ka shlem ai jingnang jingstad kaba la ioh ban rakhe ia u mawmer hapdeng kiba bun ki diengpynkiang bad ki jingtynjuh.
“Ka jingnang jingstad ka dei kawei na ki bynta ba kongsan ha ka jingim jong u wei pa u wei u briew ha kane ka juk kaba mynta, ka jingdon jong ki shlem ai jingnang jingstad ka long kaei kaei kaba donkam ban ai jingiaroh naduh ki bor pyniaid skul, ki nonghikai bad kiwei kiwei kiba len lade ban pynioh ia ka jingnang jingstad ia ki khun ki kti jong kane ka dong ka thain ha Byrnihat”, ong u Bah Sohtun.
Ka skul kala pyllait paidbah ruh ia ka Souvenir jong ka jingiaid lynti ha baroh kine ki 25 snem bala leit bad pynkup burom ia ki riew rangbah, ki nonghikai ba nyngkong nalor ki khynnah skul ba pass nyngkong eh na kane ka skul.
La pynphuh pynphieng ruh ia kane ka jingplie pyrda ia ka jingrakhe ia ka Jubili Rupa lyngba ka jingiashimbynta jong ki khynnah skul ha ki jingrwai bad ki jingshad bad kiwei kiwei ki prokram.
