Nongpoh, Naiwieng 06: Ka Aspirational District ka Jylla-ka Ri Bhoi District, hynne ka sngi Balang, kala plie pyrda ia ka jingrakhe Jal Utsav kaban neh 15 sngi, ban pynsngewthuh ia ki paidbah halor ka jingkordor jong ka um bad ka jing donkam ban ri sumar ia ki tyllong um.
Ia kane ka jingialang la pynlong ha phyllaw jong ka Water Treatment Plant ka tnad PHE kaba don ha ka shnong Iewmawlong hajan Nongpoh.
Ia kane ka program la pyniaid da ka NITI Aayog lem bad ka jingiatreilang bad ka tnad PHE, ka Umling C&RD Block bad kiwei kiwei ki tnad.
Ia kane ka jingrakhe Jal Utsav la plie da u Deputy Commissioner, u Abhilash Baranwal IAS ha ka jingdonlang ka Iffat Parvin, Consultant ka NITI Aayog, u Bah M.B Tongper ADC bad SDO Patharkhmah, u Bah U.Kurbah EE PHE Nongpoh, u Bah K. Lyngdoh EE Water Resource & Irrigation Nongpoh, u Bah L.P.D Arengh Divisional Officer Soil & Water Conservation Nongpoh bad kiwei pat ki ophisar na ki tnat sorkar bapher bapher.
U Deputy Commissioner haba ai jingkren, u la pynshai halor ka jingdonkam ban sumar ia ki tyllong um haba pynpaw ba ka jingkitkhlieh lang ka long kaba donkam ban iakhun ia kane ka jingkyrduh um hapoh ka district Ri Bhoi.
U Abhilash Baranwal, kum u DC u la khot la wer ia ki paidbah bad ki khynnah skul ban shim bynta ha ka jingïaid lynti jong ka thong lyngba ka Jal Utsav bad ban long ki nongkitkhlieh ha ka jingtyngkai ia ka um, pynkhuid bad ban sumar ia ki tyllong um.
Ha kane ka jingrakhe ba 15 sngi, kin don ruh kiwei kiwei ki prokram kiba kynthup ia ka marathon ba 7 KM na Dulongnar sha NSCA Indoor Stadium Nongpoh, ki jingïakhuid shnong, ka jingïakob thoh Slogan, ka jingïaid paidbah (rally), ki jingïa kynduh kyrpang ha ki jaka ai jingsumar kum ha CHC, PHC bad Dispensaries, bad kiwei kiwei ki program.
