Nongpoh, Naitung 12: Ha ryngkat bad ka pyrthei hi baroh kawei, hynnin ka 11 tarik u Naitung la rakhe iaka World Population Day hapoh Ri Bhoi District halor ka phang “ A world of Eight Billions” ia kaba la pynlong da ka Ophis jongu Block Development Officer, Umling C&RD Block ha Nongagang Auditorium Hall, Marngar.
Ha katei ka jingialang la iadon ryngkat u Dr. R.Nongrum, BDO ka Umling C&RD Block, u Bah A. Wanswet, u nonghikai jong ka Alpha English Hr. Sec School, Nongpoh bad ka Kong A.Thabah, Counselor, DM&HO Nongpoh bad la wan ruh ban iashimbynta da ki khynnah skul bad ki nonghikai na ki skul bapher bapher.
U Dr. Nongrum, haba ai jingkren u la ong, ka long kaba kongsan ban pynlong iaka jingrakhe ia kane ka sngi ban pynsaphriang ia ka khubor ia ki jingeh kiban mih na ka jingbun briew shaba palat bad la pynlong ia kane ka prokram da ka jingthmu ban pynsngewthuh ia ki paidbah iaka jingshah ktah ka jong ki naka jingbun briew bad iaka roi ka par bad iaka ioh ka kot ha ka ri bad kumjuh ruh iaka jingshah ktah lang jong ka mariang.
U la ong, ba la katkum ki jinglum jingtip la khmih lynti ba ka jingbun briew haka pyrthei kan sa kynjoh sha ka 8 billion ha u 2022.
Katba u Bah A.Wanswet, bad ka kong A.Thabah Counselor kila ai jingbatai halor kaj ingktah jong ka jingbun briew bad ki la kren ruh halor ki mat kiba iadei bad ka jingkongsan jong ka longing longsem, ka rukom pyrkhat ne pynwandur ia kam (Planning) ban rat dyngkhong iaka jingduk, ka koit ka khiah jong ki longkmie kiba armet, ka hok longbriew manbriew, ka jingshongkha khynnah, ka jingkyrduh kam kyrduh jam bad ka jingkylla jong ka suinbneng bad kiwei kiwei.
Kum shi bynta ban pynsaphriang ia kane ka khubor, ki khynnah skul kila iashimbynta haka jingiaid rally ha kylleng ka thain Marngar bad la sam khusnam ruh sha kiba jop ia ka Best Slogan.
