Shillong Naitung 14: Ka Ramakrishna Mission Shillong, ha ka sngi Saitjain kala pynlong ia ka Youth Convention ha Ramakrishna Mission Vivekananda Cultural Centre kum shibynta ban rakhe ia ka Jubili Ksiar, kaba la wan iashimbynta da palat 250 ngut ki samla pule.
Ha kane ka prokram la wan ban iashimbynta da ki khynnah pule bad ki nonghikai na ki arphew ar tylli ki jaka pule kiba kynthup ruh ia ki khynnah na ki jaka pule kiba don ha Sohra, Shella bad Sohbar.
Shiphew ngut ki nongkren la jied napdeng ki jaka pule kiba wan iashimbynta ha kaba ki khynnah pule kila kren halor ki phang bapher bapher bad la pynlong ruh ia ka jingiamir jingmut hapdeng ki khynnah pule bad ki riewshemphang bad kila ioh ban buh ia ki jingkylli ki bapher ia ki riewshemphang.
U Sharad Vivek Sagar, CEO jong ka Dexterity Global haba kren ha ka jingialang ula ai mynsiem ia ki khynnah pule ba kin minot thop bad ba kin trei shitom ban lah ban pynurlong ia ka thong ka jong ki.
Ha kane ka sngi la pynlong ruh ia ka prokram ha kaba iadei bad ka jingrwai iaki jingrwai Khasi tynrai bad ki jingshad da ki khynnah pule jong ka Ramakrishna Mission Higher Secondary School, Sohbar bad Sohra bad ka jingshad Wangla da ki khynnah pule jong ka Ramakrishna Mission Vivekananda Cultural Centre, Shillong.
Ha kane ka jingialang la iadonlang u Swami Bodhmayanada, Adyaksha, Ramakrishna Mission Math and Mission, Hyderabad, u Swami Hitakamananda, Secretary ka Ramakrishna Mission, Shillong bad u Swami Varananada u Principal ka RKM HS School, Sohra.
