Nongstoiñ, Nohprah 9: Ka seng trei mon sngewbha kaba la tip kum ka Nongstoiñ Social Service Society, ha ka sngi palei ka la ïoh ban rakhe ïa ka sngi kyrpang jong ki briew kiba duna dkhot met, da kaba pynlong ïa ki jingpynbyrngia bapher bapher ba kynthup ïa ki jingïakop dro dur da ki khynnah kiba duna dkhot met bad kiwei kiwei ki jingïalehkai.
Ha ha katei ka sngi kyrpang u bah Polestar Nongsiej kyrtong MLA na ka seng UDP na Nongstoiñ constituency u la long kum u kongsan katba ka kong V.C War District Social Welfare Officer Nongstoiñ, ka la donlang kum ka symbud kongsan bad ïa katei ka jingïalang la pynlong ha NSSS Hall Nongstoiñ.
La ong dei na ki daw ki bym lah ban kiar namar ka jingïatyngkhuh bad kiwei pat ki kam, ka seng ka la hap ban rakhe ia kane ka sngi ha ka 8 tarik u Nohprah 2022. Ïa kane ka sngi kyrpang ym shym la lah pat ban rakhe ha ka 3 tarik kaba dei ka sngi kaba la buh ryntih da ka UN, kaba la don lang ruh bad ka theme kaba la ong “Transformative Solution for Inclusive Development the Role of Innovation in fueling an Accessible and Equitable World”.
“Nga kyntu ïa kiba duna dkhot met ba phim dei ban sngewpher namar nga kum uwei u nongkhaïi, nga lap ba don bun ki briew kiba duna dkhot met ki long kiba don kham bun ka sap ka phong kaba U Blei u la ai ha ki ban ïa kaba ngi don ma ngi bad ki don ruh kaba kham kyrpang. Nga lap ïa kita namar ki don kiba trei bad nga, don uwei u ba matlah kawei ka khmat. Hynrei u dei uba tbit bha ban trei kam makhanik, don ruh kawei ka longkmie kaba dei ka accountant ha ka kam jong ngi”, ong u Bah Polestar Nongsiej.
“Kum ki briew kiba bit ba biang ruh kim dei ban kynthoh ne mudui ïa ki jingbakla jong ki briew kiba duna dkhot met ha kino kino ki kam, haba la tip ba ki dei kiba duna kumno phi dang mudui. Don ruh ki bym patiaw ïa ka jingdonkam jong ki briew kiba duna dkhot met haba ki ïadei kam. Kum ïa kita ki jinglong ka lah dei ka por ba ngin pynduh noh”, u la ong.
Ha katei ka sngi nalor kitei ki kynrem ki lyndan, la ïadonlang ruh u Lyngdoh ka balang katholik u James Anderson Syiemlieh, Director ka Nongstoiñ Social Service Society, NSSS, kong Mariantina Lyngkhoi bad la pynïaid ïa katei ka jingïalang da u samla Govinsen Ïawphaniaw dkhot ka NSSS.
