Shillong, Nailur 22: Ka Department of Neurology, NEIGRIHMS, Shillong, ha ka sngi Saitjain kala pynlong ia ka jingshna ‘Poster’ ban pynsngewthuh paidbah shaphang ka jingpang Alzheimer bad ha kajuh ka por ban rakhe ia ka World Alzheimer’s Day.
Ka phang, jong kane ka jingrakhe ka long “Time to Act on Dementia, Time to Act on Alzheimer’s Disease,” kaba pyni ia ka jingdonkam ban shimkhia ban weng ia kane ka jingpang, kaba la nang kiew ha kylleng ka pyrthei. La pynlong ia kane ka jingiakop ha ki lai tylli ki bynta: Nursing Officers, Interns & Resident Doctors bad nongtrei ha ki OPD bad ki nongjop ha kawei pa kawei ka kyrdan kila ioh ia ka jingithuh halor ka jingstad bad ka jingnoh synniang ban pynphriang ia ka jingtip.
Kane ka jingthmu ka pyni ia ka jingaiti jong ka NEIGRIHMS Hospital ban kyntiew ia ka jingtip ha ki nongtrei jong ki bad ban hikai ia ki paidbah halor ka jingdonkam ban lap kloi bad ban shimkhia ia ka jingpang Dementia bad Alzheimer bad ban ialeh pyrshah ia ka jingshah niewbeiñ.
Ha kane ka sngi la sam ia ki khusnam bad la ioh ruh ia ka jingkren na u Prof Dr. S R Sharma Head of department of Neurology, NEIGRIHMS, U Prof. (Dr.) A. Santa Singh, Dean, NEIGRIHMS, U Prof. Dr. C. Daniala, Medical Superintendent ka NEIGRIHMS.
U Director ka NEIGRIHMS u Prof. Dr. Nalin Mehta ula ïaroh ïa ki nongïashimbynta na ka bynta ki jingnoh synniang ka jongki bad ula pynpaw ïa ka bynta ba kongsan jong ki nongsumar ha kaban ai jingsumar ïa ka jingpang Alzheimer bad ula banjur ia ka jingdonkam ban batai bad ai jinghikai ia ki bahaiing bahasem jong kiba pang Dementia bad Alzheimer khnang ba kin lah ban ai ka jingsumar bad ka jingiarap kaba pura.
