Shillong, Naiwieng 15: Ka jylla Meghalaya ryngkat bad ka ri hi baroh kawei hynne ka nsgi kala rakhe iaka jingsdang jong ka “Viksit Bharat Sankalp Yatra,” ka sienjam ban wanrah jingkylla kaba thmu ban pynpoi ia ki kam ka Sorkar sha ki jaka bym pat poi bad ruh ka jingpynpoi ia ki skhim Sorkar.
Ka jingthmu jong kane ka yatra kadei ban ai jingtip sha ki paidbah bad ban pynpoi ia ki jingmyntoi jong ki skhim ba iadei badka jingkhuid jingsuba, ki jingshakri ha ki kam pisa, ka bording elektrik, ka jingioh ia ka tyndong LPG, ki iing sah ia ki briew kiba duna jingioh, ka jingshngain ha ka jingioh mar bam, ka bam kaba tei met, ki lad ai jingsumar kiba shngain, ka umdih kaba khuid bad kiwei kiwei.
Ha Meghalaya, ka Viksit Bharat Yatra kadei kaba la plie paidbah ha East Khasi Hills District ha ka sngi Balang bad ka Yatra kan long ha baroh ki Gram Panchayat (GP)/Block jong ka West Jaintia Hills, East Garo Hills bad North Garo Hills District.
U Chief Secretary ka jylla u Bah DP Wahlang ula pyllait paidbah ia ka kali kaba rah ia ka khubor jong ka “Viksit Bharat Sankalp Yatra” na Meghalaya Legislative Assembly Secretariat, Khyndailad, Shillong ha kaba ula plie paidbah ruh ia ka Jan Jatiya Gaurav Divas (Tribal Pride).
U Bah Wahlang ula ban jur halor ka jingieng skhem ka jylla halor ka Viksit Bharat Sankalp Yatra kaba long ha baroh kawei ka ri bad kane ka Yatra ka dei ka dak jong ka sienjam kaba heh na ka bynta ka India kaba la kiew shaphrang bad kaba ai bynta ia baroh ha kaba ka don ka jingbahkhlieh jong baroh na ka bynta ka roi ka par bad ka jingriewspah jong ka ri.
U Chief Secretary u la plie paidbah ruh ia ka jingiaid kjat ban pyni ia ka deiriti halor ka Tribal Pride da ki barikor, ki kynhun pyni deiriti.
Ha ka prokram kaba la pynlong na ka bynta ban rakhe ia ka Jan Jatiya Gaurav Divas (Tribal Pride) ha U SosoTham Auditorium, Shillong, la wan ban iashimbynta da u Myntri ka tnat Arts & Culture, u Bah Paul Lyngdoh kum u kongsan katba u CEM ka KHADC u Bah Pyniaid Sing Syiem ula long u symbud kongsan.
Ha kane ka prokram la pynlong ruh ia ka jingbuh syntiew ha ki mot jong ki riewshlur jong ka jylla.
La don ruh ka tribal museum kaba pyni ia rukom shet, ki rukom shna tiar bad ka deiriti jong ki riewlum ha kane ka prokram.
U Myntri Rangbah duh ka ri u Narendra Modi ula ai jingkren ha ka prokram ban rakhe ia ka Janjatiya Gaurav Diwas, 2023 ha Khunti, Jharkhand bad ula plie paidbah ia ka ‘Viksit Bharat Sankalp Yatra’ bad ka PradhanMantri Particularly Vulnerable Tribal Groups Development Mission.
Nalor kane ula pyllait paidbah ruh ia ka bynta jingsiew kaba 15 jong ka PM-KISAN bad ula buh maw nongrim bad aiti sha ka ri ia ki projek ha Jharkhand kiba shongdor haduh T.7200 klur ha ki kam bapher bapher kum ka rel, surok, pule puthi, dewiong, Petroleum bad Natural Gas.
La pyni ruh ia ka Video, ha kaba ka President jong ka India, ka Droupadi Murmu kala ai jingkren.
