Shillong, Nohprah 11: Ka Meghalaya Legislative Assembly Secretariat hynne ka sngi Nyngkong, kala pynlong iaka jingrakhe Pre-Christmas ha Administrative Block kaba don ha Khyndailad, Shillong.
Naka liang u Commissioner & Secretary ka Meghalaya Legislative Assembly u Dr Andrew Simons ula ai ka jingkren pdiang sngewbha ia u Lamphang ka ïingdor u Thomas A Sangma, u Symbud Lamphang u Timothy D Shira, u Myntri Rangbah ka Jylla u Conrad Sangma, ki Symbud Myntri Rangbah ba kynthup u Bah Prestone Tynsong bad u Bah Sniawbhalang Dhar, ki Myntri Sorkar ba kynthup, ki MLA bad ki MLA barim bad ki nongtrei jong ka Meghalaya Legislative Assembly Secretariat.
Ha kane ka jinglehkmen Pre-Christmas, naka liang u Lamphang ka ïingdorbar Thomas A Sangma ula ai ia ka khubor Christmas kaba kmen ia baroh kiba don ha kane ka sngi bad ula ong “Hapdeng ka jingdon bynta haka sain hima, ngi donkam ban lehkmen iaka Christmas kaba dei ka aiom ban iatylli bad ban lehbha ia baroh”.
Naka liang u Symbud Lamphang ka ïingdorbar u Timothy D Shira ula aikhublei bad ula kitbok ia baroh kiba don bynta ha kane ka sngi ban kynmaw iaka sngi kyrpang jong ki riewngeit Christians.
Naka liang u Myntri Rangbah ka Jylla u Conrad Sangma ula ai khublei ia u Lamphang ka ïingdorbar bad iaka Meghalaya Legislative Assembly Secretariat kaba la pynlong iaka Pre-Christmas.
La ioh sngew ki khubor Christmas bad jingduwai na Reverend Lyndan Syiem.
Ha kane ka sngi la ioh sngew ki jingrwai na ki khynnah ka AW Thomas Girl’s Home bad na u MLA ka Mawkyrwat u Bah Renikton Lyngdoh Tongkhar.
Nalor kine la sakhi ki jingrwai tynrai naka St. Cecilia Choir jong ka Laitumkhrah Parish Cathedral.
Ha kane ka sngi, naka liang u Lamphang ka ïingdorbar ula sam ki jingai sngewbha iaki khynnah jong ka AW Thomas Girl’s Home.
