Shillong, Naiwieng 29: Ka Mawpait-Nongthymmai IVCS (MNIVCS) ha ka 28 tarik Naiwieng kala rakhe ia ka jingdap lai snem (2019-2022) ka jong ka daki prokram ba kynthup ia ka ‘Drinking Water Competition’, ‘Tug of War’, Dancing & Short Skit hapoh ka shnong Nongthymmai Raiddewsaw.
Ha shwa jong kane ka prokram ka la don ka jingialang haka jingdon lang u Senior Cooperative Officer bah Y. Lyngdoh na ka ophis SRCS Mawkyrwat bad ka jingpdiang sa ia ka shnong Mawlyngroh kum kawei na ki shnong kaba dang shu wan pyniasnoh shen bad ka MNIVCS.
Ka Mawpait-Nongthymmai IVCS kadei ka IVCS kaba kynthup ia ka shnong Mawpait, Tlongpleng, Nongthymmai, Raidewsaw, Domshken, Domshken Rum bad Mawlyngroh.
U bah Y. Lyngdoh haba ai jingkren u la iaroh ia ka MNIVCS ba ka la iaid kham shaphrang ha ki jingtreikam jong ka bad u la pynkynmaw ba kane ka IVSC kala sdang mynshuwa tang kumba 43 ngut ki dkhot hynrei mynta kala poi sha ka 200 tam.
U bah Donboklang Kharlyngdoh Secretary Shnong haba pynshai ia ka rukom treikam ka IVSC, u la ong ba ka jingdon ka MNIVCS ka la pynsuk shibun ia ki nongshong shnong ha kaba kynshew pisa.
Ka kong Victorealness Syiemlieh kala pynpaw ia ka jing sngewtynnad ban tip ba ka MNIVCS ka rakhe ia ka jingdap 3 snem ha ka lynti iaid ka lyngba ka jingdon lang ki nongialam kiba shemphang ki ba nang iatrei na bynta ki kam ka imlang ka sahlang.
Kum ka longkmie ka la ioh ruh ban ai jinghikai shaphang ka jingngop jong ki briew ha ki tyngka pliah, khamtam ha ka por ilekshon bad ka la ong ba kum kawei na ki longkmie hapoh ka thain, ka don ka mynsiem ban iatreilang bad ki paitbah hynrei da ka jingieit ym da ka bor jong ka pisa.
Ki nongjop ha ka jingiakhun Tug of war ki long ka Kyrshanlang PG kum ka lahduh bad ka Nangroi Bon PG kum ka ba wan baar katba haka ‘Drinking Water Competition’ ka Iaipyrshang PG ka la long ka rah iaka nam lahduh bad ka La -I-Bor Barit PG ka la wan baar.
