Shillong, Nohprah 01: Kumba ju leh man u snem hapoh Meghalaya bad ha kiwei ki ri jong ka pyrthei, ka tnad ka koit ka khiah ka jylla haka jingiatreilang bad ka Meghalaya Aids Control Society (MACS) kala rakhe ia ka World AIDS Day hynne ka sngi palei ha nongbah Shillong.
Haba kren ha kane ka sngi, u Principal Secretary ka tnad ka koit ka khiah Sampath Kumar u la ong ba ka long kaba donkam bha ba ki briew kin mih shakhmat bad ban pynlong ia ka jingialang ban pynphriang ia ka jingtip ha kaba iadei bad ka jingpang HIV.
U Sampath kumar u la ong ba kum kine ki jingialang bad ki prokram ki long kiba donkam khamtam naka bynta ki paidbah ba kim dei ban leh rain hynrei kidei ban mih sha khmat ban leh ia ka Test namar ba ia ka kyrteng jong ki briew la buh rieh bha ym ba pyntip paidbah.
U la ong ba kum kine ki jingialang kin pyntip paidbah ruh haba iadei bad ka jingtip kumno lah ban ioh iaka jingpang HIV bad kumno ki briew ki lah ban iada ialade bad iala ki ba ieid bad kumno ban ioh ki lad jingiarap la kadei naka sorkar ne na kino kino ki seng kiba ialeh ban ratdkhong ia kane ka jingpang.
Na ka liang jong ka Project Director jong ka MACS ka Dr. B Decruse ka la pyntip ba hapoh ka jylla Meghalaya ka jingdon jong ki briew kiba don ia u khniang jingpang niangkulia ne HIV la antad ki don kumba 8692.
Ka Dr. Decruse kala iathuh ba napdeng kine tang 4900 ngut kiba la tip tikna ba ki don ia ka jingpang HIV bad kiba sah ka long kumba 43 percent kim don jingtip satia.
Haba ai jingkren ha kane ka jingrakhe ia ka World Aids Day ka Chief Judicial Magistrate ka kong N. I Dkhar kala ban jur bha halor ka hok bad ka kamram ba ki briew kiba don ia ka jingpang HIV kidei ban ioh ia ka hok bad ruh ba kim dei ban shah pyniapher hynrei kidei ban long lang kumjuh ha kaba iadei bad ka jingioh ia ka hok jong ki.
Ha kane ka sngi na ka liang ka MACS kala sam ruh ia ka jingai sngewbha sha ki ANC Check-ups, Antenatal Check-ups centre sha ki hospital bapher bapher bad kumjuh ruh sha ka kynhun jong ki seng trei mon sngewbha bad la ioh ruh ban pyllait paidbah ia ka jingrwai ha ryngkat ka jingring dur kaba iadei bad ka jingpang HIV.
