Shillong, Jymmang 05: Ka tnat Forest and Environment ka Sorkar Jylla kala rakhe iaka sngi pynneh mariang lane ka ‘World Environment day’ ha National Institute of Fashion Technology, Umsawli.
Ia ka sngi rakhe pynneh mariang la pynlong daka Social Forestry bad Environment Wing, Meghalaya halor ka phang pdeng ‘Land Restoration Desertification and Drought Resilience’.
Kumjuh ruh ka Sein Raij Jowai bad ka Ophis u Superintendent of Police ka West Jaintia Hills kila pynlong ia kane ka jingrakhe da ki prokram thungdieng.
Haba kren ha ka jingialang ka Tnad Forest, u Chief Secretary (CS) ka Jylla Bah DP Wahlang u pynpaw ka jingsngew nguh iaka tnat kaba pynlong iaka jingialap paidbah daka jingkyrmen ba kane kan iarap iaka Jylla haki snem ban wan.
“Kane kadei ka sngi ba rakhe ha baroh kawei ka pyrthei naka bynta ban ialap paidbah halor ka jingdonkam ban iada bad ban pynneh iaka mei mariang” la ong u CS.
U CS ula ong ba ka mei mariang kadei ka jingsdang ban im u khun bynriew namar ka ai ki jingdonkam ban im bad ban roi ki briew.
“Ka jingiadei hapdeng ki briew bad ka mei mariang kam long kaba bha namar ka jingkiew ka jingkharoi u khun bynriew bad ka ioh ka kot ka pynap jingma iaka mei mariang namar ka jingpom pathar iaki dieng, ka jingbym tyngkai iaki marpoh khyndew ka wanrah iaka jingkylla haka suin bneng” ula ong.
U Chief Secretary haka jingkren u iai ba donkam ban iaid katkum ki lai tylli ki A kata ka Awareness, Action, and Aspirations.
Ha kane ka sngi ka tnat kala pynkupburom iaki nongtrei ka Social Forestry Division ka East Khasi hills daka ba sam khusnam bad mementos shaki ba jop haka jingiakop Drawing, Painting, Slogan bad Essay Writing Competition.
Kumjuh ruh ka Seinraij Jowai kala pynlong ia ka jingthungdieng ha Loom Mookhai, ka jaka kaba la ngeit ba ki saw ngut ki shipara (Bon, Tein, Wet bad Doh) kila iaiad lyngba shuwa ba kin shongshnong ha Sor Jowai.
Shuwa kane ka jingthungkam ba palat 300 tynrai, kala don ruh ka jingialang ba lyngkhot ia kaba la wan pynshongkun da ka Tourism Officer ka WJH SD Shylla kaba la pyntip ba kum shibynta jong kane ka jingrakhe, ka Ophis Tourism kala thung ia palat 4000 tynrai ki dieng ha WJH District.
Ka Ophis u Superintendent of Police ka WJHD kala rakhe ia ka sngi pynneh mariang halor ka mat “Ek Ped Maa Ke Naam” ha kaba ki Heh Pulit bad ki Nongtrei kila thung mar shi tynrai ki dieng ha sawdong ka Jowai Police Station.
