Shillong, December, 04: Ka Ophis jong ka Commissioner for Persons with Disabilities ryngkat ka jingiatreilang bad ka State Resource Centre on Disability Affairs, hynne ka Lah sngi u Blei kala rakhe iaka International Day for Person with Disabilities ha ka jingialang kaba la pynlong ha State Central Library, Shillong.
Ia kane ka jingrakhe kaba la ai kyrteng da ka ‘EMPOWERFEST-2023’ la plie da u Myntri ka tnad Social Welfare u Bah Paul Lyngdoh ha kaba la iadonlang u Pravin Bakshi u Commissioner Secretary ka tnad Social Welfare bad kiwei kiwei.
Haba kren ha kane ka jingrakhe u Bah Paul Lyngdoh ula banjur ban tei iaka imlang sahlang kaba ai iaka lad ia baroh bad ban pynkup bor ia ki briew kiba don jingduna haka dkhot met bad ula ong ba ka sorkar kadei trei borbah halor ki jingtyrwa ban kyntiew ha kaban pynsuk ia ka leit ka wan jong ki briew kiba don jingduna haka dkhot met ha ki jaka sorkar bad ki jaka paidbah.
Ha kane ka sngi, ka Ophis jong ka Commissioner for Persons with Disabilities kala pynkup burom ia u Director jong ka Sanker Rehabilitation Centre u Dr. Sandi Syiem da ka khusnam “Champion of Mental Health Advocacy Award” bad ka Carmo Naronha jongka Bethany Society da ka khusnam “Leader of Equality Award”.
Ka Meghalaya Blind Women’s Football Team kala ioh iaka Inclusive Sportsmanship Award, Rupari Nongrum ia ka Inspirational Artist Award, ka St. Edmunds College da ka Trailblaizer in Accessibility Award, Sengrang G Momin da ka Inclusive Media Representation Award bad Ibadalin da ka Literacy Award.
U Myntri sorkar ula pyllait paidbah ruh ia ka megAbility App ia ki briew kiba don jingduna haka dkhot met ne PWD.
