Shillong, Iaiong 13 : Ka Hynniewtrep Border Dispute Redressal Forum (HBDRF) kala rakhe ia ka 13 tarik Iaiong kum ka sngi ba sngewsih, bad pynbna ba kan iai bteng ban kynmaw ia kane ka sngi manla u snem tad haduh ka jingpynkynriah biang ia ka Block-I bad II sha Meghalaya.
Ha ka kyrwoh ba pynmih ha ka sngi Nyngkong, u Chairman ka HBRDF Bah Chandame Sungoh ula pynkynmaw ia ki paidbah b aka 13 tarik Iaiong ka dei ka sngi jong ka jingsngewsih, khamtam ki nongshongshnong ka Elaka Labang Nongphyllut Block-I bad ka Raid Nongtung Khyrwang Block-II, namar ka dei ka sngi ba rah bad pyniasoh jubor ia kine ki jaka da ka Sorkar Assam ha u snem 1951.
“Ka dei ha kane ka sngi ha u snem 1951 ba ka Sorkar Assam kala pyniasoh jubor ia ka Block-I bad II na ka Jowai Civil Sub-Division bad pynhap lang ia ki hapoh ka United Cachar Mikir Hills (bala tip kum kum ka Karbi Anglong Autonomous Council) lyngba ka Notification TAD/R/31/50/150-151,” ula ong.
U Bah Sungoh ula pynpaw ba kine ki jaka ki dei hok jong ka Meghalaya bad ka Sorkar Assam kala leh ia kane ka kam khlem da shim ia ka jingbit na ki nongshongshnong trai muluk kiba dei ki Khasi-Pnar.
“Ha ka jingshisha, kine ki jaka ki dei ban neh bad ka United Khasi & Jaintia Hills (mynta Meghalaya), hynrei ka Sorkar Assam kala leh ia kane ka kam khlem ka jingtip, ka jingsngewthuh lane ka jingbit jong ki nongshongshnong tai muluk kiba dei ki Khasi Pnar, kiba dei ki nongshongshnong ba dei hok bad trai jong ka jaka” ula bynrap.
U Chairman ka HBRDF ula pynpaw ruh ba watla ka Sorkar Assam kala kubur ia ka jingleh bakla bad pynmih ia ka Notification RSR/296/51/130 ha ka 13 tarik Lber 1957, bad hukum ban leh sorjamin biang bad shong bishar biang ia ki jaka, ka jingpynkynriah pat ia kine ki Block kam shym la urlong satia haduh mynta.
“Ki artylli ki District Counicl- ka United Khasi & Jaintia Hills bad United Cachar & Mikir Hills, kila pyndep ia ka jingleit jurip lang bad sorjamin ha ka 17-20 tarik Rymphang, 1958, bad mynjur ban pynphai ia ki jaka sha ka United Khasi & Jaintia Hills. Hynrei ka jingpynkynriah pat ia ki jaka kam shym la urlong haduh mynta” ula ong.
“Kumta, haduh ban da dep pynkynriah biang ia ka Block-I bad II sha Meghalaya, ka Forum kan iai bteng ban kynmaw ia ka 13 tarik Iaiong kum ka sngi ba dum ngit lane ka sngi ban leh sngewsih manla u snem” ula pynkut.
 kala rakhe ia ka 13 tarik Iaiong kum ka sngi ba sngewsih, bad pynbna ba kan iai bteng ban kynmaw ia kane ka sngi manla u snem tad haduh ka jingpynkynriah biang ia ka Block-I bad II sha Meghalaya.){kind=link}