Shillong, Iaiong 06 : Ka Bharatiya Janata Party (BJP)-Meghalaya hynne ka sngi Palei kala rakhe ia ka lyngkhuh snem ba 44 jong ka party ha ka Ophis ha Jylla bad ha baroh ki mandal jong ka ri-lum Khasi, Jaintia bad Garo.
La pynher ia ki lama jong ka BJP ha baroh ki mandal bad ha Ophis ka party ha Jylla la pynher da u President bah Ernest Mawrie ha ka jingiadonlang ki Nongkitkam, ki Khlieh jong ki Morcha, ki District President, ki mandal President bad ki dkhot ka party.
La pyndon burom ruh da ki syntiew ia ki nongseng jong ka party Dr Shyama Prasad Mukherjee bad Pandit Deen Dayal Upadhya, bala pynbud pat da ka jingkren live video jong u Myntri Rangbah Duh ka Ri Narendra Modi bad u National President JP Nadda.
Ban rakhe ia kane ka sngi, ka BJP kala pyllait ruh ia ka Sewa Hi Saptah ha baroh kawei ka ri, kaba dei ka prokram ba shitaiew lynter naduh mynta ka sngi haduh ka 14 tarik Iaiong, ka sngi kha jong u Baba Saheb Ambedkar.
U National President JP Nadda haba ai jingkren, ula ai khublei ia baroh ki dkhot ka BJP bad ula kren ruh halor ka jingiaid lynti jong ka BJP bad ki jingjop jong ka party ha ka thain Shatei Lam Mihngi bad kiwei ki bynta jong ka Ri, kaba kren ia ka jingshaniah jong ki paidbah ia ki nongrim treikam jong ka BJP.
Haba kynmaw ia ki nongseng jong ka party bad ka jingiohi jngai bad jinglen lade haba seng ia kane ka party, u Myntri Rangbah Duh ka Ri, ula ai khublei ia baroh halor ka Hanuman Jayanthi bad ong ba ka party ka ioh mynsiem na u Hanuman bad la tip baroh ba kam don satia kano kano ka kam ba u Hunuman um lah ban leh, kumjuh ruh ka BJP kala leh ia kata, kan iai bteng ban trei bad iai trei ha kaban pynthikna ia ka jingkiew shaphrang ka Ri bad ka roi ka par ha baroh ki liang.
