Shillong, Nailur 03: Ka North Eastern Hill University Teachers’ Association (NEHUTA) kala rai ban ujor sha ka President ka ri pyrshah iaka jingpynkhien iaka NEHU Act, Statutes and Ordinances da u vice chancellor ka University haba iadei bad ka jingpyntreikam iaka National Education Policy (NEP).
Kane ka rai ka wan hadien bala kut noh ka jingaipor jong ka NEHUTA ia u NEHU VC ban wengnoh iaka jingpyntip bala pynmih haka 12 tarik Jylliew bala phah shaki Principals jong ki College kiba iasoh bad ka NEHU bala soi da u Debasish Chowdhury, Officer on Special Duty (OSD), CDC ka NEHU kaba long pyrshah bad kaba ialam bakla.
Haka kyrwoh, u president ka NEHUTA u Prof. Lakhon Kma ula ong ba haka jingialang bala lum kyrkieh haka 31 tarik Nailar ka seng kala shim iaka rai bala mynjur haka jingialang jong ka general body bala long haka 26 tarik Nailar.
“Ngi la rai ban phah iaka kaiphod ba pynkhien iaka NEHU Act Statutes and Ordinances da u Vice Chancellor sha ka Visitor jong ka University ka President ka ri, sha ka ophis Prime Minister Office, sha u myntri ka tnat pule u Dharmendra Pradhan, shaka myntri ka tnat pla tyngka ka Nirmala Sitharaman bad sha kiwei ki myntri sorkar pdeng, sha u Chief Rector jong ka University u Lat ka jylla bad sha u myntri rangbah ka jylla” la ong u Prof. Lakhon.
Ula ong baka Association kala rai ruh ban Boycott iaki jingialang jong ka Academic Council (AC) hadien habud.
U Prof. Lakhon ula ong baka NEHUTA ka au khublei iaki dkhot kiba khlem shim bynta ban thaw iaki kot jingkylli jong ki First Semester haka kyrdan pule UG hapoh ka NEP katkum ka jingrai ka GBM.
“Haduh mynta ki dkhot ka NEHUTA ki dang kyntait ban shim bynta ban thaw iaki jingkylli jong ki First Semester haka kyrdan pule UG hapoh ka NEP katkum ka jingrai ka GBM” ula ong.
Nalor kane u Prof. Lakhon ula ong baka Academic Council haduh mynta kam pat rai haba iadei bad ki model Qs papers hapoh ka NEP naka bynta ki UG kaba long kaba donkam katkum ka NEHU Ordinance ban pynryntih iaki Qs paper ha baroh ki subjects.
“Namar ka jingbym ka model Qs papers, ki nonghikai ki hap ban thaw jingkylli bad kane kam iahap bad ki eksamin UG jong ki First Semester katkum ka NEP kim lah ban pynlong” ula ong.
Nalor kane u Prof. Lakhon ula ong ka NEHUTA ka sngewkhia baka NEHU kam ialehkai bad ka lawei ki samla pule UG daka ba kyrkieh ban pyntreikam iaka NEP khlem ka jingiamynjur daka AC khlem da pynkhreh ban pyntreikam iaka NEP, khlem da iathir sani bha haba iadei bad ki model Qs papers haka jingialang jong ka AC, Ki Syllabus jong baroh ki subjects naka bynta ki 3rd haduh 8th Semester.
