Shillong, Nailur 08 : U Lamphang ka Iingdorbar Thomas A Sangma ula rai ban bteng ha ka ban ithuh ia u MLA ka North Shillong Bah Adelbert Nongrum kum u dkhot ka Voice of the People Party (VPP) haba pynpaw ba ka shithi sospon, kam dei kaba la phah sha u kum u MLA.
“Nga la ioh pdiang ia ka shithi (sospon). Ka dei ka jingshisha ba ula shah sospon na ka party hynrei ngam lah pat ban pdiang ia ka naba ka shithi sospon bala phah sha nga, la phah sha u Bah Adelbert Nongrum, tang kum u Adelbert Nongrum (Jaiaw). Ki lah ban don bun ki Adelbert Nongrum kiba sah ha kajuh ka shnong” ong u Thomas haba iakren bad ki nongthoh khubor hadien ba Dorbar Synrai haka sngi Nyngkong.
Haba kylli, u Thomas ula ong “Kumba nga ong, u dang dei shibynta jong ka VPP Legislative Party. Ula shah sospon bad ia kane la pyntip ruh sha ngi hynrei ka shithi sospon kam shym la pynpaw ia u kum u MLA. Ula shu shah sospon tang na ka party, ym na ka Legislative Party. Kane ka dei kaba ngi sngew. Ta ka daw u dang dei u dkhot ka VPP Legislative Party”.
Hynrei, u Lamphang ula pynpaw ba u Bah Adelbert ula wanrah ia kane ka kam hapoh ka Iingdorbar khlem da iaid kat kum ki lynti ba dei ban iaid, naba u khlem kdew ia kano kano ka point of order.
U Lamphang u pynpaw ba katba u bah Adelbert u don ia ka hok ban rah jingkylli kum u nongmihkhmat ba jied u paidbah, u dei pat ban iaid kat kum ki lynti kiba la buh.
U Lamphang ula khot ia u Bah Adelbert sha ka kamra jong u ban iakren bad pynbeit ia kane ka kam.
U Lamphang ula pynpaw ruh ba ka jingpynkynriah ia ka jaka shong jong u Bah Adelbert ka lah ban dei jingleh bakla jong ka Assembly Secretariat.
Haba shim ba u Bah Adelbert u dang dei u dkhot ka VPP Legislative Party, u Lamphang ula bthah ba dei ban buh biang ia ka jaka shong u Bah Adelbert ha ka jaka bala ai nyngkong.
 haba pynpaw ba ka shithi sospon, kam dei kaba la phah sha u kum u MLA.){kind=link}