Shillong, Nailur 08 : U MLA bala rangbah bha ka NPP na Resubelpara Timothy D Shira, ula iathuh ba ula buh ia ka shithi iehnohkam kum u Deputy Speaker ka Iingdorbar halor ka jingbthah jong ki Nongialam ka party.
Haba kren sha ki lad pathai khubor ha ka sngi Nyngkong, u Shira ula pyntip ba ula ioh pdiang ia ka phone call na u Myntri Rangbah Conrad K Sangma hynnin ka miet, ba bthah ia u ban iehnohkam, ia kaba ula leh khlem da buh jingkylli ia kane ka rai.
“Ngam don eiei palat ban kynthoh halor kane namar nga la dep buh ia ka shithi iehnohkam kat kum ka jingbthah ka High Command bad kaei kaba la bthah ia nga ban leh, nga la dep leh. Kumta kan shong ha ka jingstad jong u CM la un pynshong ia nga ha kano kano ka jaka ruh ia kata ngam pat tip” ula ong.
Haba kylli, u Shira ula ban jur ba u bat skhem ia ka jinglong beit long ryntih ka party, da kaba ong ba kum u briew ka party, um lah satia ban kyntait ia ka jingkyrpad u Myntri Rangbah.
“Nga don ia ka jingshaniah ba pura ha u Myntri Rangbah. Ngam lah ban on gem namar u dei u Myntri Rangbah ba nga sngewjan eh” ong une u Nongialam.
Haba jubab ia kawei pat ka jingkylli, u Shira ula ong “Em ngam dom satia. Nga sngewhun ia kane ka rai”.
Haba kylli ia ka lad ban ioh rung khlieh ha ka jingpynkylla ia ka Kynhun Myntri, u Shira ula pynpaw ia ka jingbym thikna bad ong ba kum kane ka rai ka shong eh ha u Myntri Rangbah.
