Shillong, Naiwieng 14 : Ki Artylli ki seng jong ki samla pule ba iakhih ha North Eastern Hill University (NEHU) kila rai ban pynbteng beit ia ka jingshah thngan ba khlem pud tad haduh bala weng noh ia u Prof PS Shukla na ka shuki Vice Chancellor.
Ia kane ka rai la shim wat hapdeng ka hukum jong ka Ministry of Education ban thung ban ia ka Inquiry Committee ki arngut ki dkhot, ka ban tohkit ia ki jingkynnoh pyniaid bakla ia ki kam ki jam bad jingpulom ka jingtreikam hapoh NEHU.
Kane ka jingiakhih bala lamkhmat da ka North Eastern Hill University Students’ Union (NEHUSU) bad kyrshan da ka Khasi Students’Union (KSU-NEHU Unit) kala jam sha ka sngi kaba 10.
U General Secretary ka NEHUSU Toniho S Kharsati ula ong “Ngi la iohpdiang ia ka jingpynbna na ka Ministry of Education ba pynbna ia ka jingthung ia ka Committee ban leh eiei halor ki kam ba ngi la pynsngew. Hynrei, kane ka rai kam shym la iaid kat kum ki jingdawa jong ki samla pule . Ka jingshah thngan jong ngi naduh ka sngi kaba nyngkong ka dei eh halor ka jingweng noh ia u VC bad ngin dang bteng ia ka jingiakhih katba ka Sorkar kam pat shim rai halor kane ka jingdawa”.
Haba kylli ia ka jingdon tang arngut ki dkhot ka Committee, u samla Toniho ula ong “Ka long kaba sngewsih ba ka Sorkar ka khlem thung iano iano ruh kiba tip bha shaphang ka NEHU bad ki jingeh ba iakynduh da kane ka skulbah. Ka jingdon lang jong ki dkhot na Jylla kan wanrah jingshai bha halor ki jingdonkam jong ka skulbah bad ka thain”.
Une u Nongialam ki samla pule ula ong “Tad haduh ba ka Sorkar kala pyntreikam ia ki jingdawa jong ngi ban weng noh ia u Vice Chancellor, ngin iai bteng ia ka jingshah thngan khlem pud kampher ia ka jingthaw ia kano kano ka committee. Ka jingdawa ba hakhmat eh jong ngi ka sah kumjuh bad kata ka long ban weng noh ia u Vice Chancellor”.
Hadien 10 sngi ka jingshah tngan, u President ka NEHUSU samla Sandy Sohtun ula shah kit sha hospital bad shah sumar hapoh ka Critical Care Unit (CCU) ha Shillong Civil Hospital.
Shuwa kane, ki samla kiba la shah kit sha ka jaka sumar ka NEHU ki kynthup ia ka samla Ibakordor Marweiñ (Asst. GS KSU NEHU unit), Aibok Nongsteng (Organizing Secretary KSU NEHU unit), Fricky Marweiñ (Asst. Organizing Secretary KSU NEHU unit), Robin Nongrem (Asst. Education Secretary KSU NEHU unit), bad Ruksarbiya Khonglam (Asst. Hostel Secretary KSU NEHU unit).
