Shillong, K’lyngkot 05 : Ki Tourist Taxi ha Jylla kila rai ban pynlong ia ka jingiakhih da kaba sangeh kamai haduh 48 kynta naduh ka 5 tarik Kyllalyngkot, ban pyrshah ia ka Motor Vehicle Act ba thymmai ka Sorkar Pdeng, kaba kyntiew ia ka kuna bad ka por set along ia ki nongniah kali haka aksiden hit and run (tynrah briew bad phet krad), kaba long kat kum ka Bharatiya Nyaya Sanhita (BNS) ban sa treikam.
Haba iasnohkti lang bad ki jingiakhih ha kylleng ki Jylla ka Ri, ki trai bad ki nongniah jong ki kali Tourist kila pynpaw ia ka jingpyrshah ia kane ka Ain ba thymmai.
Lah ban kdew ba ki Taxi bad ki Tour Association ha Meghalaya kila ioh pdiang ia ki shithi na ki kynhun nongniah kali na Assam, ba pan ia ka jingkyrshan ia kane ka jingiakhih.
U Bhaskar Deb, General Secretary ka Khasi Hills Tourist Taxi Association, ula pynthikna ba ula ioh pdiang ia ka shithi na u Rabin Dutta, President ka Guwahati Tourist Taxi Association bad na ka Central Body jong ka Assam Tour Operator.
Kat kum ka shithi, ki kali kamai la khmih lynti ba kin sangeh kamai naduh ka 5 baje mynstep ha ka 5 tarik Kyllalyngkot.
“Ka Sorkar ka thmu ban wanrah ia kum kane ka ain kaba ki nongniah kali kim kwah shuh ban niah kali. Mano ban kwah niah kali haba don ka kuna ka kot haduh T. 10 lak nalor ka jingset along” ula ong.
Kat kum ki kyndon thymai jong ka MTA ka buh ba ka jingset along kan long haduh 10 snem lane ka kun aba T. 7 lak lada ki nongniah trok ki phet n aka jaka ba aksiden lane kiar ban pyntip ia ka jingjia sha ki Pulit.
