Shillong, Nailur 30 : Ka Sorkar Jylla kala rai ban pynkut noh ia ka jingiakajia jaka ba la neh da ki phew snem da kaba rai ban aiti noh ia ka jaka ba palat 128 acre ha Saitsohpen, Sohra Civil Sub Division, sha ka elaka Saitsohpen.
Haba pynbna ia kane hadien ba pyniaid ia ka jingialang jong ka Kynhun Myntri ha ka sngi Ba-ar, u Myntri Rangbah ka Jylla Conrad K Sangma ula ong ba ka Kynhun Myntri kala mynjur ia ka jingai jingmut jong ka Committee bala khlieh da u Symbud Myntri Rangbah Bah Prestone Tynsong, kaba la iakren bad ki kynhun bapher bapher la palat shisnem ban pynbeit ia kane ka kam.
“Kumba 128 acre ka jaka yn aiti noh sha ka elaka, katba kaba sah kan iai neh bad ka tnad General Administrative (GAD) bad ka Sorkar Jylla” ula ong jaba iakren bad ki nongthoh khubor.
Kane ka jingiakajia jaka ka dei kaba la mih naduh ka por ba synshar ka ri Bilat ha kaba ka Hima kala kam trai ia ka jaka da kaba pynshong nongrim ia ki kot ki sla bala rim bha bad ka jingshong shnong.
“Ki don katto katne ki jaka kiba la pyndonkam da ki nongshongshnong bad da ka elaka la bun phew snem wat hashuwa ka jingioh Jylla la ka jong bad bun na kine ki jaka ki dei naduh ka por ba synshar ka Sorkar Bilat. Namar kata, halor ki kot ki sla, kila don ki jingiakren bad ka Elaka bad ngi la shim ia kane ka rai” ong u Conrad.
“Da kane ka rai, kane ka jingiakajia bala sahteng la slem bha bad ki jingiapher jingmut hapdeng ka elaka bad ka Tnad GAD, nga kyrmen kumba nga ong ba kin beit noh. Shisien bala shim rai ka Kynhun Myntri, kin sa iasoi noh ia ka soskular bad ki kynhun ba don bynta bad kin sa jam shakhmat da ka lynti ban pynbeit syndon ia kane ka kam bala neh la slem” ula bynrap.
