Agartala, Naiwieng 28 :Ka Kashari ha Tripura ha ka sngi Balang ba la lah kala rai pynrem da ka jingiap pyrshah ia uwei u runar 40 snem rta halor ka jingdonkti ha kaba pyniap ia ki ki san ngut ki briew, kata kaba kynthup iala ki jong ki arngut ki khun kynthei, u hymmen bad uwei u heh pulit ha kane ka snem ba la dep.
U nongaiktien ki pulit ka Tripura ula ong ba ka kashari jong ka District and Sessions Court ha Khowai district kala rai pynrem da ka jingiap pyrshah ia u runar ba la shah kynnoh donkti u Pradeip Deb Roy namar ka jingdonkti ha kaba pyniap dusmon iala ki jong ki arngut ki khun kynthei ba dang rit, ka Aditi Deb Roy bad ka Mandira Deb Roy, u hymmen u Amalesh Deb Roy da kaba bom da u nar rod ha ka jingjia kaba la jia ha ka 26 tarik u Naiwieng jong ka snem ba la dep ha ki bynta jong ka Uttar Ramchandraghat kaba ha Khowai district ka Tripura.
Hadien ba ki bor pulit hapoh ka jingialam jong u inspector Satyajit Mallik kila wan poi ha ka jaka ba la jia, u Deb Roy ula thombor ia uwei u heh pulit lem bad ia ki arngut kiwei pat, kata ia u Krishna Das bad u khun jong u, u Karnadhir Das katba ki dang wan iaid da ka auto rickshaw najan ka iingsah jong u da kaba pyndonkam da u nar rod.
Hadien utei u pulit inspector bad u Karnadhir Das kila khlad noh hapdeng ka jingshah sumar namar ka jingmynsaw kaba jur.Nalor kata u Deb Roy ula pynmynsaw jur ruh iala kaj ong ka kurim ka Mina Paul (Deb Roy) ha katei ka jingthombor.
Ka jingpyntreikam ia kane ka rai pyniap pyrshah ia u Deb Roy yn pyndep hadien ka jingpynthikna da ka iingbishar ka Tripura High Court, ong u nongaiktien ki pulit.
