Agartala, Jylliew 30: Ka iingbishar District Court ha Tripura ha ka sngi Balang ba la lah ka la rai pynrem da ka jingiap pyrshah ia uwei u runar ba la tip kyrteng kum u Kali Kumar Tripura namar ka jingdonkti ha ka ba leh beijot bad pyniap dusmon ia kawei ka khynnah ka ba dang 5 snem rta.
Ka Judicial Magistrate ka Khowai district ka Shankari Das ka la pynbna ia kane ka rai hadien ba la shim ia ka jingphla jong ki 35 ngut ki sakhi bad hadien ki sakhi satar lyngba ki tiar wad bniah bathymmai ka ba kynthup ia ka jingleh forensic bad post mortem report ia ka ba la wanrah da ki pulit hakhmat ka iingbishar.
La pynbna ia kane ka rai pynrem da ka ba bishar bniah halor ka kam pyntriem ba shyrkhei ka ba la pynkhihwin ia ka jylla baroh kawei, ong u APP Ajit Sarkar lyngba ki lad pathai khubor.
Katei ka jingjia ba shyrkhei ka la jia ha ka 22 tarik u Rymphang 2021. Katei ka lanot ka la jah rngai na la iing napoh ka shnong Duski ka ba hap hapoh Teliamura police station jong ka Khowai district.
Hadien ba ki pulit ki la shimkhia halor kane ka jingujor da ki ba haiing hasem jong kane ka khynnah, kumta ruh na ka liang ki pulit ki la kem bad set noh ia u Kali Kumar Tripura kum uwei na ki ba shah suba jur ha kane ka jingjia.
Hadien ba ki pulit ki la pyrshang ban lap ia ki sakhi satar ki ba biang pyrshah ia u Tripura, une u briew u la phla halor ka jingdonkti. Ia ka ba sah jong katei ka khynnah la lapdien na ka jaka khlaw ka ba don marjan.
Lah ban kdew ba ia katei ka rai pynrem la pynbna ha kane ka jan miet sngi Balang ba la lah ha ka ba da ki spah ngut ki paidbah ki la ialum ang shabar jong ka iingbishar ban sngap ia ka rai. Ki bor pulit ki la pynngat ia une u runar ha ki kyndon ain 376 bad 302 jong ka Indian Penal Code bad section six jong ka POCSO act.
