Shillong, Nailur 29 : Ki Seng pyniaid kam jngohkai kynthup ki Tour Operator ha Meghalaya, kila ia rai lang ban pynneh ia ka jinglong ba shongsuk shongshngain hapoh ka Jylla na ka bynta ka jingmyntoi jong baroh ki kynhun ba don bynta ha ki kam jngohkai bad ruh ki nongwankai.
Kane ka rai ka dei kaba la shim ha ka jingialang bala pynlong da ka Tour Operators Association of Meghalaya (TOAM) bad ba la wan iashimbynta da ki 11 tylli ki seng pyniaid kam jngohkai bad ki Tourist Taxi Association, kaba long ha State Convention Centre, Shillong ha ka sngi Saitjain.
Ka jingakren kala phaikhmat eh sha ki kam ba iatakhuh da ki nongniah kali Tourist, khamtam ki jingpynsngew jong ka All Khasi Meghalaya Tourist Taxi Association (AKMTTA).
“Hadien ka jingiamir jingmut kaba bniah bha, ki dkhot jong baroh ki seng kila mynjur iaka jingkongsan ban pynneh ia ka shongsuk shongsain ha Meghalaya na ka bynta ka jingmyntoi jong baroh ki kynhun ba don bynta ha ki kam jngohkai bad ki nongwankai. Kila kular ruh ban pynthikna ia ka jingshngain bad jingiada ia ki nongwankai kiba wan sha Jylla” ong ka kyrwoh.
Ki 11 tylli ki seng pyniaid kam jngohkai ka Meghalaya ki kynthup ia ka Meghalaya Tourism Development Forum (MTDF), All Khasi Meghalaya Tourist Taxi Association (AKMTTA), Tour Guides Association of Meghalaya (TGAM), All Shillong Tourist Taxi Drivers Union Organization (ASTTDUO), Meghalaya Tourist Taxi Association (MTTA), Federation of Shillong Hotels (FOSH), Sohra Region Tourism Association (SRTA), Jaintia Tourism & Environment Society (JTES), Khasi Hills Tourist Taxi association (KHTTA), bad ka Ri Bhoi Tourism & Environment Development Forum (RBTEDF).
