Khlem pat ktah ia ka Block-II ba dei da uwei u Chairman ka Committee
Nongpoh, Naitung 22 : Ki Regional Committee ka Ri-Bhoi District bad Kamrup, Assam, kila rai ban sdang noh ia ka jinghiar jurip ia ki Shnong ba don hapdeng ka jingiakajia pud, naduh ka 26 tarik Nailar ban lum ia ki jingtip halor ki jinglong jingman jong kine ki Shnong, shuwa ba kan don ka jingiakren pynbeit pud hapdeng ki Myntri Rangbah ka Meghaaya bad Assam.
Kine ki Regional Committee kila shim ia kane ka rai ha ka jingialang ba long hynne ka sngi Saitjain ha Assam State Guest House, Koinadhara, Khanapara.
Haba iakren bad ki nongthoh khubor, u Symbud Myntri Rangbah ka Jylla bad Chairman ka Regional Committee ka Ri-Bhoi Bah Prestone Tynsong, ula iathuh ba kane ka jingialang kala iatai shuwa tang ia ki lai tylli ki sector-ka Desh Doomreah, ka Nongwad Mawtamur bad ka Borduar.
U pyntip ba ka jingialang kam pat iakren eiei ruh em halor ka thain Block-II namar u Chairman jong ka Regional Committee ka Assam u dei da uwei pat bad une u dei u Pijush Hazarika uba dei u Myntri Sorkar. “Ia ka Block-II ngin sa iapynbeit hadien bala dep shuwa ia ki lai tylli ki sector” ula bynrap.
Ia ka Regional Committee ka Assam la lamkhmat sha kane ka jingialang da ki arngut ki Myntri Sorkar ba kynthup ia u Atul Borah bad u Chandra Mohan Patowari.
U Bah Prestone u pyntip ba kine ki Committee ka Jylla bad Assam kin sa shong jingialang biang ha ka 25 tarik u Nailar ban iakren kham bniah ia kine ki lai tylli ki sector ba iakajia pud.
“Ngi la rai ha kane ka jingialang ba ngin sdang noh ia ka jingiajurip lang ia kine ki shnong ba iakajia pud bad kane kan sdang naduh ka 26 tarik Nailar na ka Desh Domreah Sector ban sa pynbud pat ia ka Nongwah Mawtamur sector bad Borduar sector” ula ong.
Ha kane ka jingialang, la iashimbynta ruh da ki arngut ki Deputy Commissioner kynthup ia u Arpit Upadhaya na ka Ri-Bhoi District bad u Deputy Commission kam Kamrup District.
Pule ruh: Aipor shitaiew ka SSTP ia ka Airtel bad Jio ban pynbiang ia ka Network ha thain Tyrso
