Nongstoin, Nohprah 17 : Ki paid nongshongshnong ki 21 tylli ki Shnong ka West Khasi Hills, kiba hap ha ki lai tylli ki Polling Station-ka Misei, Langdongdai bad Mawsmai, kila rai ban leit ap ha khyrdop ka Khasi Hills Autonomous District Council (KHADC) ia ka rai jong ka Council ban pynphai pat ia ki sha Mawshynrut constituency ha ka elekshon MDC ban wan.
Kine ki 21 tylli ki Shnong kila pyrshah jur ia ka rai jong ka KHADC ban pynkynriah ia ki na Mawshynrut constituency sha ka Rambrai-Jyrngam constituency ha ka jingpynbeit thymmai ia u pud u sam ki constituency ba dang shu leh dang shen.
Kane ka rai jong kine ki Shnong kala mih na ka jingialang Executive Committee ka Joint Action Committee ki Lai Polling Station, bala thaw da kine ki Shnong, kaba long hynne ka sngi Ba-ar ha Iingdorba ka Misei.
Kat kum kane ka rai, ka JAC kan leit biang ban ialum ha khyrdop ka KHADC ha ka 19 tarik Nohprah, ban ap ia ka rai jong ka Dorbar Tlang ka Iingdorbar Thaw Ain ka Council, ka ban iakren ia ka jingpynphai biang ia kine ki shnong na ka Rambrai-Jyrngam sha ka Mawshynrut constituency.
Ka JAC kala kyntu ia ki 30 ngut ki MDC ka KHADC ba kin kyrshan ia ka jingdawa jong ki nongshongshnong ki 21 tylli ki Shnong ha kane ka Dorbar tlang jong ka Council.
Lah ban kdew hangne, ka JAC kala dep ban lum ia ki jingialang paidbah ha baroh lai tylli ki Polling Station hashuwa ba kin tur paidbah sha KHADC bad ai dorkhas ha u Chief Executive Member (CEM) Bah Pyniaid Sing Syiem bad u DyCEM Bah Pynshngainlang N Syiem.
Ka JAC kala kyntu ruh ia u MDC ka Mawshynrut Bah Gigur Myrthong bad MDC ka Rambrai-Jyrngam ba kin iasaid tyngeh ha Iingdorbar ban pynurlong ia ka jingkwah bad jingangnud u paidbah ki 21 shnong.
 ia ka rai jong ka Council ban pynphai pat ia ki sha Mawshynrut constituency ha ka elekshon MDC ban wan.){kind=link}