Shillong, Nailur 03 : Ka Taekondo Federation of India (TFI) kala pynbna ba kan ai jingithuh noh tang kawei ka Taekwondo Association na kawei pa kawei ka Jylla, kaba long kat kum ka kyndon bala buh da ka Ministry of Sports and Youth Affairs ka Sorkar India.
Kane ka rai kala mih halor ka jingthmu ban pynbeit ryntih ia ka rukom pyniaid ia ka jingialehkai Taekwondo hapoh ka Ri.
Kat kum ka kyndon (Rule) jong ka Taekondo Federation of India, kino kino ki Taekwondo Association ba don tam ha kano kano ka Jylla kin dei kiba shah khein kum ka jingpynkhein ia ka jingbuh kyndon. La ongba ka TFI kan nym ai jingithuh shuh ia kine ki association.
U L. Sukoon Sing, Vice President ka Taekwondo Federation of India, ula pynthina ia kane ka rai ha ka jingiakynduh bad ki nongthoh khubor shabar jong ka Taekwondo Black Belt Examination ba arsngi, kaba long ha Shillong.
U Sing ula pynpaw ia ka jingsngewkhia halor ka jingmih bun tylli ki Taekwondo Association ha ki Jylla bapher bapher, kaba lam sha ka jingpynlong ia ki lympung ialehkai ba khlem ki rule bad kyndon kiba thikna.
U Sing ula ban jur ba kane ka sienjam ka dei kaba donkam ban lah pynbeit ryntih ia ka jingialehkai Taekwondo ha baroh kawei ka Ri. Hapoh kane ka hukum ba thymmai, tang ki Association ba ioh ia ka jingithuh ha ki Jylla kin ioh ia ka lad ban jied ia ki nongialehkai ki ban iashimbynta ha ki National bad International Games.
