Shillong, Nohprah 19 : Ka Sorkar Jylla kala rai ban weng noh ia ka kyntien ‘Backward Classes’ na ka Meghalaya Public Service Commission Regulation.
Ka rai ban pynkylla ia ka regulation la mynjur da ka jingialang jong ka Kynhun Myntri bala pyniaid da u Myntri Rangbah ka Jylla Conrad K Sangma hynne ka sngi Ba-ar.
“Kam don satia ka jingbuh bhah ia ki blackword classes ha ka Jylla jong ngi. Namar kata, ka jingdon ka kyntien ha ka (MPSC) Rules ka dei ka bym don jingmut. Kumta, ngi la shim rai mynta ba kane ka kyntien kam dei ban don shuh” ong u Conrad haba iakren bad ki lad pathai khubor
Cabinet has approved the amendment to the Meghalaya Public Service Commission (LOF) Regulations, 1972-Instruction regarding direct recruitment through the Public Service Commission issued by the Governor subject to the Provisions of Regulations made under Article 320 (3) of the… pic.twitter.com/XHY55lYblm
— Conrad K Sangma (@SangmaConrad) December 19, 2023
Ka Kynhun Myntri kala ai jingmynjur ruh ban pynkylla thymmai ia ka Service Rules jong ka Meghalaya Civil Defense and Home Guards.
U Conrad u pyntip ba ki don hapdeng 300-400 tylli ki kam kiba lait thylli ha kane ka Tnad.
“Kumta, kala don ka sienjam ban thung briew noh ha kine ki kam ba lait kumba ngi la leh ha kiwei ki Tnad kum ka Tnad Pule Puthi bad ka Koit ka Khiah bad ruh ka Tnad Pulit” ula ong haba bynrap “Ha ka tnad Home Guard and Civil Defence ruh, la bthah ia ka Tnad ba kan wanrah ia ki jingpynkylla ha ka kyrdan pule ka ban long kumjuh lang bad jong ka Tnad Pulit bad ka Kynhun Myntri kala mynjur ia kane ka rai khnang ba kin lah ban pyniaid shakhmat ia ka jingthungkam”.
