Shillong, Nohprah 19 : Ka kynhun synrop Regional Democratic Alliance (RDA) kala pynbna ia ka kyrteng u Nongialam barim ka seng HYC samla Robertjune Kharjahrin ban long kum u kyrtong ka kynhun sha ka elekshon MP-Lok Sabha ka ban long ha u snem ban wan na Shillong Parliamentary constituency.
Ka RDA ka dei ka kynhun synrop jong ka United Democratic Party (UDP) bad ka Hill State Peoples Democratic Party (HSPDP).
Ia kane la pynbna da u Chairman ka RDA bad President ka UDP Bah Metbah Lyngdoh hynne ka sngi Ba-ar.
La iathuh ba u samla Robertjune Kharjahrin yn iakhun ia kane ka elekshon ha ka shap jong ka United Democratic Party (UDP) kaba dei ka Bom.
Lah ban kdew hangne ba u MLA barim ka Mawlai Bah PT Sawkmie ruh ula pan ia ka ticket jong ka UDP ban mih iakhun ha kane ka elekshon MP-Lok Sabha ban wan.
Kat haduh mynta ka sngi, tang ka NPP bad ka kynhun RDA kiba la pynbna ia ki kyrtong ki ban mih aireng na Shillong Parliamentary constituency nalor u President ka Congress bad sitting MP Bah Vincent H Pala u ban mih iakhun biang na ka Congress.
Ka NPP kala pynbna ia ka Myntri Sorkar kong Ampareen Lyngdoh ban long ka kyrtong ha kane ka elekshon.
