Shillong, Nailar 25 : Ka Sorkar Jylla kala mynjur ia ka jingtyrwa ban thung noh ia u Secretary ba pura jong ka Meghalaya State Council of Technical Education (MSCTE), Shillong.
Haba pyntip ia kane hadien ka rai jong ka Kynhun Myntri, ka Myntri bad Nongaiktien ka Sorkar Kong Ampareen Lyngdoh kala pynpaw ia ka jingdonkam baka MSCTE kan don noh ia u Secretary ba pura namar ka jingnang bun ki Polytechnic hapoh ka Jylla.
Ka pyntip ba ki Polytechnic kila don ha Shillong, Tura bad Jowai nalor ki 4 tylli kiban dang mih.
Ka Myntri ka pyntip ba ka Sorkar kala rai ba ka Additional Director ba mynta ka DHTE ka A Ali namar ba kan sa shongthait noh shen, kan dei ka Secretary ba nyngjong eh jong ka MSCTE na ka bynta 24 bnai (2 snem).
Ha kajuh ka por, ka Kynhun Myntri kala mynjur ruh ban thung ia u CP Marak, IFS (Retd) kum u Executive Chairman ka MBoSE, Tura bad kane ka jingthungkam ia u kan long na ka bynta 12 bnai (1 snem).
Ka Sorkar kala mynjur ruh ia ka jingthungkam biang ia ka Kong Ripnar Lyngdoh, IAS (Retd) kum ka State Information Commissioner jong ka Meghalaya State Information Commission.
Ha kajuh ka por, ka Sorkar kala mynjur ia ka cabinet memorandum ha ka dur jong ka Bill ban pynkylla kyrteng ia ka Captain Williamson Sangma Technical University sha ka Captain Williamson Sangma State University.
