Shillong Lber 26: Ka Sorkar Jylla kala shim ia ka rai ban thied ia ka iing building kaban shongdor T.20 Klur ban buh ia ka Meghalaya Guest House ha Bangalore khnang ba yn lah ban pynbiang jaka sah ia kiba leit jingleit bad ia ki khynnah pule ka jylla Meghalaya.
Haba pyntip ia kane hadien bala wai ka jingialang jong ka Kynhun Myntri kaba la long ha ka sngi Balang, u Myntri ka Sorkar Jylla u Bah Paul Lyngdoh ula ong, ba katei ka building kaba la tyrwa kaba don ha Bangalore kan lah ban ai jaka sah ia ki 50 ngut ki khynnah shynrang bad 50 ngut ki khynnah kynthei.
“Ka Bangalore kadei ka jaka kaba ki briew na ka jylla Meghalaya ki leit bha bad ngi don ruh ia bun ngut ki khynnah pule kiba leit ban pule ha ki kyrdan ki bapher bapher ha katei ka nongbah” ula ong.
Haba kylli, la ki don ia kano kano ka jingthmu ban tei ia ka Meghalaya House ha Bangalore, u Bah Paul ula ong “Ia mynta hi, kaba donkam kyrkieh ka long ban pynbiang ia ka jingdonkam jong ki khynnah pule. Ka jingthmu ban tei ia ka
Meghalaya House kadei ruh kaba la don ha ki jingmut jingpyrkhat hynrei ban ialeh ban pynbiang noh mardor khamtam haba bun ki khynnah pule ki shem jingeh ban ioh ia ka jaka sah bad ka dor ruh ka long kaba rem bha, hynrei lada tei ia ka
Meghalaya House ngin donkam ban thaw shuh shuh ia ki post bad ban buh ruh ia ki ophisar”.
“Kumta ban ioh ban shimkhia noh mardor ia ka jingdonkam kyrkieh, ngin pynbiang shwa ia katei ka jingdonkam ia ka Guest House kaban dei kyrpang na ka bynta ki nongleitkai bad ki khynnah pule ka jylla” ula ong.
