Shillong, Naiwieng 16: Ka Kynhun Myntri ha ka sngi palei, kala mynjur ban thung ia ka Meghalaya Education Recruiment Board (MREB) ba shirta, ka ban thungkam ha baroh ki kam ba lait jong ka tnad Education hapoh ka lai haduh hynriew bnai.
Haba iakren bad ki Nongthoh khubor, u Myntri Rangbah ka Jylla Conrad K Sangma ula ong “Ngi la rai ban thung ia ka MREB ba shirta”.
Ula ong “Ki don haduh 187 tylli ki kam ba lait hapoh ka Tnad Education khamtam ha ka Higher & Technical Education, wat ki Secondary bad Higher Secondary bad kiwei kiwei ki kyrdan ruh. Ha ki katto katne ki khep, ki kam ba lait kila don haduh 3-4 snem bad kumta ngi sngew ba kane ka Board ka dei ban don bad kan pyndep ia ka jingthungkam hapdeng ka 3-6 bnai ha baroh kine ki kam ba lait”.
Ha ki snem bala leit ruh, ka Sorkar Jylla kala thung ia ka Meghalaya Medical Recruitment Board (MMRB).
“Ka daw halor kane ka dei namar kila don bun ki kam kiba lait bad ka MPSCN kam shym la lah ban pynlong ia ki eksam ha ka por kaba biang bad lada phi kynmaw, ngi khlem lah ban thung ia ki doktor haduh 5 snem hynrei tang mar syn dep thung ia ka Health Recruitment Board, ngi la lah ban thung haduh 500 ngut ki doktor tang hapoh ka 3 bnai” ula ong.
U Conrad ula ong ba ka Education Recruitment Board kan shimkhia ruh ia ki jingthungkam ha baroh ki kam ba iadei bad ka pule ka dangle.
