Shillong, Risaw 18: Ka Sorkar Meghalaya Democratic Alliance-II, kala shim ia ka rai ban siew pyndep noh iaka T.565 Klur ka pisa kaba dang pynsah sha ka National Thermal Power Corporation (NTPC) da kaba siew Installment haduh 20 sien.
Ia katei ka jingtyrwa jong ka tnad Bording la mynjur da ka jingialang jong ka Kynhun Myntri kaba la ialam da u Myntri Rangbah ka jylla u Conrad K Sangma hynne ka sngi Balang.
Haba iakren bad ki nongthoh khubor hadien ba la wai ka jingialang, u Myntri ua khmih ia ka tnad Bording u AT Mondal ula ong ba ka tnad kala iaid ban iakren bad ka NTPC hadien ba kala don ka jingkiew jong ka pisa sha ka T. 665 Klur kaba sahteng ban siew bad lada ailad beit ba kan bteng shen kan sa kynjoh sha ka T.1000 Klur bad kan pynmih iaka jingeh kaba khraw ia ka Meghalaya Power Distribution Corporation Limited (MePDCL) Meghalaya Energy Corporation Limited (MeECL) bad ia ka Sorkar Jylla.
“Hadien ba la dep ban iakren khah khah, kumta kila mynjur ban siew noh ia ki T.565 Klur ha ka jaka jongka T.664 ne T.665 Klur. Kumta ngi la sngew sting ha kaba iadei bad katei ka bynta hynrei ia katei ka pisa hap ban siew lyngba ka Installment ne ban siew pyndep khyndiat khyndiat haduh 20 sien” ong u Mondal bad ka bynrap ba ka NTPC kala mynjur ban map noh ia ka T. 100 Klur bad mynta ka don ka lad ban pynhiar ruh ia ka sut.
Ula ong ba ka MeECL kam long kaba khlain ha kaba iadei bad ka jingdon ka pisa ka tyngka bad kumta ka sorkarjylla kala shim ia ka rai ban siew ia ka pisa kaba T.565 Klur sha ka NTPC.
“Ngi dang iaid hapdeng ka jingiakren sngewthuh jingmut bad ka NTPC ka long kaba kloi ban iakren pynbeit, hato ia katei ka pisa yn hap ban siew hapoh ka jingsiew 20 sien ia ka Installment ne ngi lah ban pynjynsur ha kaba iadei bad ka jingsiew Installment khnang ba kan pynduna ruh ia ka jingkit kaba khia. Kumta ngi kwah ba shisien ba ka kynhun myntri kala shim ia ka rai, kumta kan plie ia ka lad ban lah ban kiew sha ka 30 ne ngin iakren ban pynbun shuh shuh bad ba kan ym don shuh ka jingshim sut ia katei bad ngin pyndep ia katei ka pisa kaba sah sha ka NTPC bad ban khuid noh ha kaba iadei bad ka jingshateng ban siew ia ka pisa jong ka NTPC” ula ong.
Ula pyntip ruh ba kham mynshwa ka sorkar jylla kala shim iaka ram lyngba ka Atmanirbhar bad la siew 50% ia kapisa kaba dang sah kaba kot T.488 Klur sha ka NTPC.
“Na ka T.488 Klur, ngi la siew T.244 Klur bad mynta kaba sah kala long noh T.665 Klur. Lada kam don ka jingiakren katei ka pisa kan dang kiew shuh shuh bad kan pynlong ia ngi ban poi sha ka jingkyrduh pisa bad ban lait na katei ka jingjia, kumta ka sorkar kala long kaba kloi ban pdiang ia ka jingtyrwa jong ka tnad Bording” ula ong.
Ula ong ba katei ka jingjia kala mih kadei namar ka jingsoi iaka jingiatehkular hapdeng ka sorkar jylla bad ka NTPC ha u snem 2007.
“Ka NTPC kala shim ha ka dor kaba rem. Ngi la kren ia ki ban pynduna ia kasut bad ia ka dor kaba kila buh hynrei kitei kiei kiei baroh kim shym la urlong. Hadien kane, ngi la leit ruh sha ka iingkashari hynrei namar ba la ia soi iaka jingiateh kular la pyndonkam bad pyntreikam wat ka iingkashari kamshym la ai iaka rai kaban long na ka bynta jong ngi” ong u Myntri ka tnad Bording.
