Shillong, Nailar 24: Ka Sorkar Meghalaya Democratic Alliance (MDA) hynne ka sngi Balang kala rai ban pyntreikam noh ia ka 2nd National Judicial Pay Commission ha Jylla.
Cabinet has approved the proposal to extend the Second National Judicial Pay Commission (SNJPC) as directed by the Hon’ble Supreme Court. pic.twitter.com/qnW9jRVKap
— Conrad Sangma (@SangmaConrad) August 24, 2022
Ia kane ka rai la shim da ka jingialang jong ka Kynhun Myntri kaba la pyniaid da u Myntri Rangbah ka Jylla Conrad Kongkal Sangma.
“Ngi la pan ia ki jingai jingmut na ka Tnad Finance bad Personnel, la wanrah bad pyntip sha baroh ki Dkhot jong ka Kynhun Myntri. Ngi la iakren ia kane ka kam bad ka Kynhun Myntri kala ai jingmynjur ban pyntreikam noh ia ka 2nd National Judicial Pay Commission” ong u Myntri Sorkar James K Sangma haba iakren bad ki nongthoh khubor.
Kat kum ka jingong jong u, ia kane ka rai la shim halor ka jingbthah jong ka Iingkashari Supreme Court.
U Myntri u pyntip ba ka Sorkar India kala pynmih jingpynbna ha ka 16 tarik Naiwieng 2017 ba iadei bad ka 2nd National Judicial Pay Commission.
Ki kyndon jong kine ki jingai jingmut ka long na ka bynta ban don ka nongrim ka ba iadei bad ka jingsiew ia ka tulop bad kiwei kiwei ki jingmyntoi sha ki Judicial Officer, ban shong bishar ia ka rukom siew ba mynta bad ka jinglong jingman ha ka jingshakri bad ruh ban ai ia ki jingai jingmut kynthup ia ki jingmyntoi hadien bala shongthait bad kiwei kiwei, ula ong.
