Shillong, Nailar 09: Ka Sorkar Jylla hynne ka sngi ba-ar kala rai ban pyniar ia ka jingtreikam jong ka e-Stamping Project sa sha ki lai tylli ki District ka Jylla ba kynthup ia ka West Jaintia Hills, West Garo Hills bad Ri-Bhoi District.
Ia kane ka rai la shim hapoh ka jingialang jong ka Kynhun Myntri kaba la mynjur ban pynkylla thymmai ia ki kyndon jong ka Meghalaya Stamps (Payment of Duty by mean of e-Stamping) Rules, 2020.
Ka e-Stamping Project ka dei kaba la sdang na East Khasi Hills District tang hapoh kawei ka Counter kaba don ha Ophis jong ka Deputy Commissioner bad kaba la pyntreikam da ka Central Record Keeping Agency (CRA).
Seeing the success in terms of ease of doing business especially for high denomination non-judicial stamp papers, Cabinet has decided to extend its implementation to #WestJaintiaHills, #WestGaroHills & #RiBhoi Districts with the ultimate aim to implement the same across the State
— Conrad Sangma (@SangmaConrad) August 9, 2022
“Namar ka jingshem ha kine ki khyndiat snem, ngi la rai bad sngew donkam ban pyniar ia ka jingpyntreikam ia ka e-Stamping ha kiwei kiwei ki District kum ha West Jaintia Hills, West Garo Hills, Ri Bhoi bad da ka jingthmu ruh ban pyniar ia ka jingtreikam ha baroh ki District jong ka Jylla” ong u Myntri ka tnad lum khajna James PK Sangma haba iakren bad ki nongthoh khubor hadien ka jingialang.
U Myntri u pyntip b aka CRA kala ai jingmut ba ka jingpyntreikam ia kane ka project ha kiwei ki District ka dei ban long da ka jingthung ia ki Authorised Collection Centre (ACC), ki ba hap mynjur da ka Sorkar Jylla.
U Myntri u ong ba kane kan kyntiew ia ka jingpynrung ia kane ka jingshakri ban saphriang bad ruh kan pynjanai bad pynsuk ia ka jingpyndep ia ki kam ki jam khamtam ia kiwei ki District ka Jylla.
Hynrei ula ong ba ka CRA kala kdew ba ka jingioh Commission ka long kaba rit bha. Ka long tang 0.65 percent jong ka stamp duty bala lum bad ka CRA ka hap ban iabhah ia kane bad ka ACC namar ka ACC ka hap ban pynbiang ia ki kor Computer, ki nongtrei bad kiwei kiwei.
Haba kdew nuksa ia kaei kaba leh ha kiwei pat ki Jylla kum ha Karnataka, Assam, Tripura bad kiwei kiwei, ula ong ba lada khmih bniah hangne ha ka thain Shatei Lam Mihngi, ka service charge ka leit sha ka ACC namar ka jingpynbiang ia ka e-Stamping.
“Namar kata, kaei kaba ngi la rai hangne ha Jylla ka long ba ia ki kot Non-Judicial Stamp ba shongdor haduh T. 1000, ka service charge kan long T. 10 bad ia ki kot Non Judicial Stamp ba palat ia ka T. 1000, ka service charge kan long T. 20” ula pyntip.
