Shillong, Nailur 16 : U Myntri Rangbah ka Jylla Conrad Kongkal Sangma hynne ka sngi Thohdieng ula pyntip ba ka Sorkar kala rai ban nym pyndam satia (scrap) ia ka Meghalaya Regulation of Gaming Act bad Rules 2021 namar kane ka ain ka dei kaba pyllait ia ki trai shnong ba kin jot na ki kam khalai.
“Ka Gaming Act bad Rules ka khang ia ki trai shnong ba kin ialehkai. Namar kata, lada ngi pynduh noh ia kane ka Ain, ki khun samla jong ngi ki lah ban ialehkai bad kan nym don satia ka jingkhang ia ki” ong u Conrad.
U Myntri Rangbah ula kren ia kane haba jubab ia ka Zero Hour Notice bala wanrah da u MLA ka Nongkrem Bah Lambor Malngiang haba dawa ia ka Sorkar ba kan pynduh pyndam noh ia ka Meghalaya Regulation Gaming Act and Rules, 2021 hapoh ka Iingdorbar.
Haba pynpaw ba ka jinglum khajna kala hiar n aka T.600 klur sha ka T. 100 klur, u Conrad ula ong ba ka jingthmu jong ka Sorkar ka long ban wanrah noh ia ki Gaming Zone khnang ba kin wanrah khajna ia ka Jylla.
“Ngi kwah ban pynbiang tarajur ia kiei kiei baroh bad ban pynthikna ia ka jingioh khajna ba T.500-T.600 klur bad ruh ban iada ia ki paidbah na ki kam khalai bapher bapher. Namar kata, ngi pyrkhat ban buh ia ki gaming zone ha ki jaka khappud khnang ba ki briew jong ngi kin ym iajan bad kitei ki jaka…dei da kane ka jingthmu ba ngi lah jam shakhmat bad kane ka kam” ula ong.
U Conrad ula pyntip ba naduh u Kyllalyngkot mynta u snem, phra ngut ki briew kila applai lisen ban buh ia ki casino ha kaba lai ngut kila ioh iaka Provisional Licence ha u bnai Lber kaba im tang 6 bnai.
U Conrad u ong ba ki Nongialam Niam kila iakynduh ia u ha u bnai Jymmang ban pynpaw ia ka jingsngewkhia jong ki ia kane ka kam. “Nga la dep batai ia ki Nongialam Niam ba kam dei satia ka jingthmu ban wanrah ia ki Casino ha Shillong hynrei ha ki jaka ba iajan bad ka Guwahati” ula bynrap.
Haba pynpaw ba ia kane ka jingthmu la pynsangeh noh namar ka jingpyrshah, u yMyntri Rangbah u ong ba ia ki application jong ki san ngut ki nongpan lisen la pynsangeh noh bad ym shym la ai shuh ia ki provisional licence.
“Nga la batai ia ki Nongialam Niam ba ka sorkar kam don jingthmu shuh ban pyniaid shakhmat ia kane ka kam khlem da shim lang ia ka jingmynjur u paidbah. Haba nga iakynduh ia ki Sengbhalang ruh nga la batai ia kajuh ba nga la dep kular ha ki Nongialam Niam ba naduh u Jymmang haduh mynta, ngi khlem pat leh eiei ban pyniaid shakhmat ia kane ka kam”.
“Ngi wan hangne ban trei na ka bynta ki paidbah jong ka Jylla bad ka dei ka kamram jong ka Sorkar ban sngap ia ka sur u paidbah” ula ong.
Nalor kane, u Myntri Rangbah ula pynpaw ruh ba ka Sorkar jong u, kam don jingthmu satia ban leh da kaba bor haba ai nuksa ia ka jingiakren bad ki Autonomous District Council (ADC) halor ka jingpyntreikam ia ka CrPC bad CPC ha Jylla.
“Nga thikna ba lyngba kane ka jingiakren bad ki kynhun bapher bapher ngin sa lap ia ka lynti kumno ban iaid shakhmat namar ngam ju don hi kata ka jingngeit ban iakhun pyrshah hynrei ngi dei beit ban iakren bad wad ia ka lynti. Namar kata, ka kular jong nga ka ieng ba hadien ka jingiasyllok ngin sa pyntyllun shakhmat ia ka kam (halor ka kam buh Casino” ula bynrap.
