Shillong, Nohprah 04 : Ka Sorkar Jylla kala rai ban pynpoi noh ia ki optical fibre sha man ki Block ka Jylla ban pynkhlain ia ki lad pyniasoh lyngba ki kor internet.
Kane ka rai kala mih na ka jingialang bishar kam bad ka Tnad Information Technology ba long hynne ka sngi Nyngkong.
Haba iakren bad ki nongthoh khubor, u Myntri Rangbah ka Jylla Conrad K Sangma ula pyntip ba ka jingiakren kaba bniah kala don bad ka Tnad Telecom, ka Power Grid ha kaba la rai ba kin pyniaid noh shakhmat ha kaban siang ia ki optical line sha baroh ki Block.
“Ngi la dep buh ia ka roadmap bad ha kane ka project kan sa sdang da ka kylla kylla. Ka Sorkar ka khmih lynti ba ka kam kan sdang la kumno kumno ha u bnai Lber 2024 bad khmih lynti ban pyndep ia ka kam hapoh 12-15 bnai kata ha u bnai Jylliew ne Naitung 2025” ula ong.
“Ngi khmih lynti ba baroh ki Block ha ka Jylla bad ruh ki Sub Division kin ioh noh ia ki lad pyniasoh da ki optical fibre” ula bynrap.
Ka Sorkar kan pynthikna ba lada don kino kino ki jaka pule, ki hospital ne ki Ophis treikam kiba kwah ban shim connection, ki lah ban shim ha kano kano ka por ynda la pynpoi ia u lain opticle fibre kat haba pynkut.
