Shillong, Rymphang 15 : Ka Kynhun Myntri ka Sorkar hynne ka sngi Palei kala ai jingmynjur ia ka jingtyrwa ban pynkiew noh ia ka Secretarial Assistance ba ju ai sha ki Judge bala shongthait.
Haba iakren bad ki nongthoh khubor, u Myntri Rangbah ka Jylla Conrad K Sangma ula iathuh ba ka Kynhun Myntri kala ai jingmynjur ia ka jingtyrwa ban pynkylla ia ka Retired Judges’ Secretarial and Domestic Help, Rules, 2013.
“Ia kane la pynkylla khatduh ha u snem 2015 bad kumta da ka jingkyrpad kaba wan na High Court bad haba pynshong nongrim ia ki jingai jingmut, ngi la wanrah ia ki jingpynkylla ha kane ka Rule” ula ong.
U Myntri Rangbah u pyntip ruh ba ka Kynhun Myntri kala mynjur ruh ia ki kyndon ban pynkylla halor ka jingsiew bala ai jingmut da ka 2nd National Judicial Pay Commission.
