Shillong, Jylliew 15 : Ka Sorkar Jylla kala rai ban pynia donbynta lang ia ki Balang kum shibynta ha ka jingiakhun jong ka ia ka thma pyrshah ia u droks hapoh ka Jylla bad kala mang T. 10 klur shisnem ban pyndonkam ha kane ka thma.
Ia kane ka rai la shim ha ka jingialang bala pynlong da u Myntri ka Tnad Social Welfare Bah Paul Lyngdoh bad ki Nongialam jong ki Balang bapher bapher, kaba long hynne ka sngi Palei ha Secretariat.
Haba iakren bad ki nongthoh khubor, u Bah Paul ula ong ba ki jingai jingmut kiba kongsan kila mih na kane ka jingialang kaba la iatai halor ka jingdonkam ban pynkhlain ia ka jingiakhun pyrshah ia ka jingjyllei u droks.
La mih ruh ka jingai jingmut halor ka jingdonkam ban pynbun ia ki jaka iasyllok, ki jingpynsngewthuh paidbah bad ban tehlakam ia ka jingpynbit thit ia ki nongdih droks.
“Kum u soh ba mih na ka jingiakren, ngi la mynjur ban iaid ha ki arbynta jong ka jingiakhun. Kaba nyngkong ka long ban pyniadon bynta lang ia ki Balang bapher bapher ba kin iasnohkti lang ha ka jingiakhun pyrshah ia u drok” ula iathuh.
U Myntri ula ong ba ia mynta, ka Sorkar kan sa buh ia ka mang tyngka ba kot T. 10 klur ban ai sha ki Balang ba kin pyndonkam ha kaban rat dyngkong ia u droks bad ka jingdih droks.
U Bah Paul u pyntip ba la kyrpad ruh ia ki Balang ba kin leit ban iasyllok ia kane ka kam hala iing bad ong “Ngin sa pynshong nongrim kat kum ka jingdonkam jong ki ban mang pisa ia ka jingialap paidbah”.
“Nalor kane, nga la kyrpad ruh ba naba bun ki skul ki dei jong ki Balang, lah ban kyntu ia ki Khynnah skul ba kin shim smai manla ka sngi ba kin ym ngop ialade lane don bynta ha ki kam kiba lah ban lam sha ka jingkyrni dih droks” ula bynrap.
Nalor kane, u Myntri ula ong ba ka Sorkar Jylla kala rai ruh ban pynkhlain ia ka jingialap pyrshah droks ha baroh ki hynriew tylli ki District kiba la ithuh kum ki ‘drug hotspot’ lem bad kiwei kiwei ki District ka Jylla.
U Bah Paul u iathuh ba ki Nongialam niam kin sa shong jingialang ha ka 19 tarik Jylliew bad hadien kane, kin sa wan sha ka Sorkar ryngkat ki jingtyrwa jong ki.
Ula kular ruh ba ka Tnad kan sa pynlong ruh ia ka jingialang kaba lai ban khot iadonlang ia ki Dorbar Shnong bad ki Senghalang ban iatai halor kane ka kam.
Halor ka jingdonkam ban pynbun ia ki Rahabilitation Centre, u Myntri ula ong ba ka Tnad Social Welfare kala bei pisa bad kyrshan ia 11 tylli ki deaddiction centre haba bynrap ba kala don ruh ka jingtyrwa ban pynkha sa saw tylli ki centre ba thymmai.
