Rai ka Sorkar ban kyntiew ia ka tulop ki Nongtrei 108 da 4 %

Shillong, Naitung 19 : Ka Sorkar Jylla kala rai ban kyntiew ia ka tulop jong ki Nongtrei 108 Emergency da 4 %.

Haba pyntip ia kane hynne ka sngi Thohdieng, ka Myntri ka koit ka khiah kong Ampareen Lyngdoh kala ong “Ngi la mynjur ban iasoi biang ia kito ki contract bad ki nongtrei 108 bad hadien ka jingiasyllok, la mynjur ban kyntiew 4% ka tulop namar kine ki dei kiba sahteng hapoh ka National Health Mission (NHM) jong ka Tnad ka koit ka khiah”.

Ka ong ba kine ki Nongtrei haba sdang ka jingiasoi soskular bad ka NHM, kaba dei ka jingpynbeit ba shipor jong ka Sorkar ban pyniaid ia ka 108 Emergency ha Jylla, kila don shibun ki jingiasyllok bad jingiakren bad ki nongtrei 108.

“Namar kila iasoi ia ka soskular ba shisnem bad ka NHM, kine ki soskular ki dei ia kaba hap ban pyn thymmai. Ka dei ka contract ba shsnem kumta ngi hap ban pynthymmai biang ia baroh kine ki contract ba ki nongtrei kiba trei ia ki kam bapher bapher” kala bynrap.

Ka Myntri ka pyntip ba ka Tnad kala iakren ruh bad ki tnad bapher bapher ban ia ai jingmut lang halor ka kam ba iadei bad ka jingpyllait tender biang na ka bynta ban pyniaid ia ka 108 Emergency Service hapoh ka Jylla.

Ka Myntri ka pyntip ba kala ioh pdiang ruh sa ia kawei ka jingthoh ba ki don sa kawei ka kynhun ki nongtrei ka 108 ki bym pat hun ia ka jingpynkiew tulop ba 4% halor ki nongrim bapher bapher.

“Kam don jingmut ban iakren ia kane hynrei khamtam ia lai jait ki nongtrei-pilot, receptionist bad ERO-kine ki nongtrei kila iasoi ia ka soskular bad ka NHM ba shisnem, kila sdang da ka tulop kaba rit bha bad kane ka dei kaba hap ban pynbeit. Ngam tip la ngin lah ne em ban leh ia kaya hynrei nga la ioh pdiang ia ka jingthoh ha ka 18 tarik Naitung, ngan sa pule ia ka” kala ong.