Shillong, Naitung 19 : Ka Sorkar Meghalaya kala dep shaw haduh 405 ngut ki samla pule bad nongshangkai pyrthei ha kine ki arsngi bala leit noh, kiba wan phai na Bangladesh namar ka jingnang jur ka jingiakhih.
Napdeng kine ki 405 ngut ki samla pule, 80 ngut ki dei na Meghalaya, 131 ngut kiba dei na kiwei ki Jylla, 249 ngut ki dei na Nepal bad 8 ngut ki dei na Bhutan. Nalor kine, 4 ngut ki dei ki nongshangkai pyrthei.
Ia kane la pyntip da ka Sorkar Jylla lyngba ka kyrwoh ba pyllait hynne ka sngi Thohdieng, haba pyntip ba kane ka jingshaw ia kine ki samla pule ka dei ha ka 18 bad 19 tarik Naitung.
La pyntip ba kane ka jingai jingiarap bad jingleit shaw ia kine ki samla pule ka dei kaba la leh ha ryngkat ka jingiatreilang bad ka Bangladesh High Commission, ka Indian High Commission ha Dhaka, Chittagong, ka Landport Authority ha Dawki bad ka Exporters Assciation.
Ka Sorkar Jylla kala buh ruh ia ka Facilitation Centre ha Dawki kaba la khmih da uwei u heh Ophisar, u Heh Pulit lem bad u Ophisar na ka Landport Authority of India nalor ka kynhun ki doktor. Kane ka centre ka don ia ki ambulance, ki dawai bad ki kali ban wan kit ia ki samla ba wan poi na Bangladesh.
Ka kynhun ki Ophisar bala buh kyrpang na Meghalaya, ba ialam da uwei u Heh Ophisar, kala peit thuh bha ia ka jinglong jingman bad ki lad ai jingiarap ia ki samla ba wanphai. Ka Indian High Commission na Bangladesh ruh kala sam ia ki Emergency contact number na ka bynta ki paidbah ba donkam jingiarap kyrkieh.
“Ka Sorkar Jylla ka kyntu ia baroh ki samla pule bad ki kmie Kpa ba kin bud ia ki jingbthah jong ki bor Sorkar bad ban buh hakhmat eh ia ka jingshngain lade shimet. Ngi la kut jingmut na ka bynta ka bhah ka mkiat jong phi bad ngin iai bteng ban ai ia kat kiba don ki lad jingiarap ha kum kane ka por” ong ka kyrwoh na ka Sorkar.
Emergency Contact Information:
Helpline Number: 1800 345-3644
Additional Contacts:
Hiwot Rymbai, Addl SP Jowai: +91 96157 16153
Thomas, Executive Officer, Land Port Authority Dawki: +91 84150 60802
