Shillong, Nohprah 19 : Ka Sorkar Jylla shen kan sa rai kut ban khangdam noh ia ka Mawmluh Cherra Cement Limited (MCCL) hadien ka jingbym lah ban pynkhie im pat ia ka kompani wat hapdeng ka jingtheh pisa ba palat T.300 klur ha kine ki 15 snem bala leit noh.
Haba pyntip ia kane hynne ka sngi Ba-ar, u Myntri Rangbah ka Jylla Conrad K Sangma ula ong “Ngin shim ia ka lynti ban khangdam noh ia ka MCCL namar ngim shym lah shuh ban pyniaid ia ka na ka daw ba ka jingkynshew pisa ka heh palat nalor ba ngi la dep kynshew lypa ia T.300 klur ha kine ki 15 snem bala leit”.
“Ngi la pyrshang katba lah ban pynkhie im ia ka karkhana hynrei namar kiba bun ki daw kiba mih, ki paidbah kila mad ia ki jingeh, ki nongtrei kila mad jingeh, ka Sorkar kam shym lah shuh ban pyniaid shakhmat, kumta ka long kaba donkam ban shim rai ban iaid tang ha kawei ka lynti. Ngim lah ban shu ieh ba kan shu snoh bad kumta, ngi la rai lang bad ha ryngkat ki kynhun bapher bapher, ba ngin khang khyrdep noh ia ka hynrei ngin leh ia kane hadien ka jingiasylloh bad ki kynhun bapher bapher haba iadei bad ki kyndon” ula bynrap.
U Conrad ula ong ba ha ka jingshisha ka Sorkar kala shim ia ka sienjam ban iapynbeit da ka jingiasngewthuh jingmut bad ki kynhun bapher bapher lem bad ki nongtrei bad “Ngi lah jan poi sha kaba kut bad ka rai ha ryngkat bad ki kynhun bad ki nongtrei ha kaba ngin pyntreikam noh da ka VRS bad ka jingia khublei kti khatduh bad ki Nongtrei ba pura jong ka MCCL”.
U Myntri Rangbah ula ong pat ba ka Sorkar kam pat rai kut ia kane ka rai bad ka dang pynkhreh mynta ia ki kyndon ha kaban khangdam noh ia kane ka kompani.
Haba kylli ia kaei kaba jia ia ka rai jong ka Kynhun Myntri ba 19 tarik Naitung 2021 ban pynim ia ka MCCL da ka Joint Venture bad ki kompani shimet, u Myntri Rangbah ula ong “Ngi kwah ban leh ia ka Joint Venture hynrei sngewsih ba ngim shym la ioh ia ki jubab kiba sngewtynnad. Kumba nga ong, haba nyngkong ba ngi don lai tylli ki lad, kaba nyngkong baka Sorkar kan pynlut haduh T.150 klur ne jan kot T.200 klur ia kaba ngi shem ba ka long kaba eh bha ia ngi ban leh”.
“Ka lynti kaba ar ka dei ba ngin leh da ka joint venture bad kila pyllait ruh ia ka jingpynbna Expression of Interest. Kila don katto katne ki kompani kiba wan hynrei kine ki kompani kim pat kotia ka kyrdan kaba ngi sngew ba kin lah ban leh hok ia ka kam” ula ong haba pynpaw b aka lynti ba khatduh eh ka dei ka rai lang bad ki kynhun bapher bapher ba ngin khang khyrdep noh ia ka kompani lada kut kine ki artylli ki lad.
