Shillong, Nailur 23 : Ka Sorkar Jylla kala kular ban pule bad bishar bniah ia ka policy jong ki Jylla ba marjan bad ban sa shim ia ka rai ha kaban leh eiei halor ki jingeh ba iakynduh da ki local tourist taxi ha ka Jylla.
Ia kane ka rai la shim hadien ka jingialang bala pynlong da u Symbud Myntri Rangbah ba khmih ia ka tnad Transport Bah Sniawbhalang Dhar bad ki dkhot ka All Khasi Meghalaya Tourist Taxis Association (AKMTTA) ha ka sngi Ba-ar.
“Hooid, ka dei ka kam kaba donkam bad ngi donkam katto katne por ban shong bishar bha ia kiei kiei baroh khnang ba kan nym mih kano kano ka jingeh ha ka lynti ka ain. Kane ka dei ka rai ba ngi shim mynta ka sngi. Ngin pyrshang ban pynbeit ia kane ka kam kham kloi kat kaba lah” ula ong.
Kumba kyrpad da ka AKMTTA, u Bah Sniawbha u pyntip ba ka Sorkar kala mynjur ban shong bishar ia ki policy jong ki Jylla ba marjan, kynthup ka Sikkim, Karnakata bad Maharashtra, ban peit ia kaei ka lynti kaba biang duh ha kaban lah pynbeit ia ki jingeh ba la mad da ki kali tourist ka Meghalaya.
“Ngi la kular ia ki ba ngin sa iasyllok bad katto katne ki Jylla ba marjan bad ngin sa ianujor bad ki Policy jong ki bad sa shim ia ka rai kaba dei” ula ong haba bynrap ba la bthah ia u Chief Secretary bad u Commissioner of Transport ba kin iakren ia kiwei ki Jylla ban ianujor ia ki policy bad sa shim ia ka rai kaban treikam ia ka Meghalaya.
Ula ong, kat haduh ban da shim ia ka rai, dei ban pynneh ia ka jinglong jingman kumba ka long.
“Ka jingiakhih kam dei ban don naba ka jingiakren kala iaid. Ngi iadon ryngkat lang bad ka dei ka jingialang kaba seisoh bad kyrmen skhem ba kan sa mih kaei kaei kaba bha ha kine ki sngi ban wan” ong u Bah Sniawbha.
Haba kylli,u DyCM ula iathuh ba ka AKMTTA kala dawa ia ka Sorkar Jylla ba kan wanrah da ka policy ka ban pynthikna ba ki trai shnong kin iohnong na ki jaka jngohkai pyrthei bad bynrap ba kane kala don ha ka jingpyrkhat jong ka Sorkar.
Nalor kane, u Bah Sniawbha ula iathuh ba ka Sorkar ka kyntu ia ki seng ki kali tourist na Assam bad na Meghalaya ba “ia mynta katba ka jingiakren ka dang iaid, wat nym pynthut ia ka iaid ka ieng ki nong leit nongwan”.
