Shillong, Nailur 29 : Ka Sorkar Jylla kala rai ban aiti noh ia ka blueprint (plan) sha ka Harijan Panchayat Committee lashai ka sngi thohdieng-kaba kdew ia ka jingtei ia ki Iing bun mala hapoh ki Quarter jong ka Shillong Municipal Board (SMB) ban pynkynriah ia ki 342 tylli ki Longiing na Them Metor.
Ia kane ka rai la shim hadien ba ka Sorkar Jylla kala kyntait ia ka jingtyrwa jong ka Harijan panchayat Committee bala phah ha ka 25 tarik Iaiong, kaba tyrwa ban ai 200 sq meter ka jaka sha kawei pa kawei ka Longiing jong ki 342 tylli ki Longiing hapoh ka European Ward nalor ban pynlut ruh ia ka jingtei Iing.
Hadien ba pyniaid ia ka jingialang bad ka kynhun Nongialam ka HPC hynne ka sngi palei, u Symbud Myntri Rangbah ka Jylla Bah Prestone Tynsong ula ong ba ka Sorkar Jylla kala pyntip ia ka rai sha kane ka kynhun ban pynkynriah ia ki 342 tylli ki Longiing na Them Metor sha ki Quarter jong ka SMB kiba don ha Bishop Cotton Road.
U Bah Prestone u pyntip ruh ba ka Sorkar kala pyni ia ka dur (presentation) jong ka Blueprint hakhmat ka kynhun jong ka HPC ha kane ka jingialang, kaba kdew ia baroh ki jingdro ba bniah bad ki jingpynwandur ia ki jingtei ki ban sa tei ha kaban ai jaka sah ia baroh ki longiing
“Namar kata, lashai ngi lah rai ban aiti noh ia ka blueprint sha ka HPC, kaba la kular ban sa lum mardor ia ka jingialang hapdeng jong ki bad sa wan pyntip biang sha ka Sorkar ia ka rai ba ki shim hadien ka shuti puja” ong u Bah Prestone.
Haba kylli, u Bah Prestone ula ong ba um pat lah satia ban tip ia kaei ka jingpyrkhat jong ka HPC la kin pdiang ne em ia ka jingtyrwa ka Sorkar hynrei ula ong “Ngin sa iakynduh biang ia ki hadien ka shuthi puja”.
Haba iakren bad ki nongthoh khubor, u Secretary ka HPC u Gurjit Singh ula pynpaw ia ka jingsngewkhia ba ka Sorkar Jylla kala kyntait ia ki rai ba 8 tylli ki mat jong ka Committee.
“Ka Sorkar Jylla kala wanrah pynban da la ka jong ka blueprint. Namar kata, ngin sa shong bishar shuwa ia ka blueprint, ngin sa leit iakren biang bad ki briew jong ngi bad ngin sa shim ia ka rai lang hashuwa ba ngin wan iakren biang bad ka Sorkar” ula ong.
Halor ka jingkylli, u Gurjit ula ong “Ha ka rai jong ngi, ngi la dawa 200 sq meter ka jaka ia kawei pa kawei na ki 342 tylli ki Longiing hynrei ka Sorkar kala ong ba kan sa pyntei da ki Iing bun mala. Hynrei watla katta, ngam lah ban shu shim rai marwei halor kane, ta ka daw ngin sa shim ia ka rai jong baroh da ki briew ba sah ha Them Metor”.
U Gurjit u pyntip ba ka HPC kan sa khot biang ia ka jingialang hadien ka shuti puja.
