Shillong, Lber 21 : Ka Shillong Contonment kala rai ban phah notice sha baroh ki nongshong Iing beain ha Lum Survey nalor ban ithuh ia ki jaka ban pyndait ia ki CCTV, ban lah peitngor ia ki kam bymman.
Ia kane ka rai la shim hadien ka jingia hiar jurip lang hapdeng ki bor District, ka Shillong Contonment, ki Pulit bad u Rangbah Shnong ka thain hynne ka sngi Thohdieng.
Haba kren sha ki lad pathai khubor, u Chief Executive Officer (CEO) ka Contonment Ayush Maury aula ong “Ngi la pynlong ia ka jingiajurip lang. Ngi la ithuh ia baroh ki jaka kiba donkam ban pyndait ia ki kor CCTV”.
“Bun eh, ngi la ithuh ia kito ki jaka kiba ju jia ki kam bymman bad tang katto katne porn gin sa pyrshang ban pyndait noh ia ki CCTV” ula bynrap.
Ula pyntip ruh ba ki don ki jaka kaba ki briew kila shong iing beain bad ka Board kan sa pyrshang ban leh eiei noh ia kine ki briew.
Haba kylli, u Maury aula ong ba ka Contonment kan sa leh da kaba tyngeh ia baroh ki jingwan kyntur pud.
“Ngin sa phah ia ki notice, ngin sa ujor ejagar bad ngin sa leh eiei pyrshah ia ki kat kum ka ain” ula ong haba bynrap “Baroh ki nongshong iing beain kin ioh shuwa ia ka jingmaham ba ki dei ban mih noh. Kat kum ka Rehabilitation Act, ngi donkam ban ai ha ki ia katti katne ki jaka bad ngi donkam ban iakren bad ka Sorkar Jylla ba kumno ngin iarap ia ki”.
Nalor kane, ula ong ruh ba kila dep ithuh ruh ia ki katto katne ki jaka ba iadei bad ka jingpynieng kali. “Ngi donkam ban pyniadon bynta lang ia u SP Traffic bad ngin sa leh sa kawei ka jingjurip halor ki surok iaid kali”.
