Shillong Nailar 08: Ka seng ki nongniah bad ki trai kali kit shyiap, kit maw, hynne ka sngi ki la shim ia ka rai ban kamai beit khlem ka Challan daka ba ong ba u maw, u shyiap um dei ba ki shalan shabar Jylla hynrei la pyndonkam tang hapoh ka Jylla hi.
Ia kane ka rai la shim hynne ka sngi Palei ha ka jingialang paidbah ba la pynlong hapoh ka shnong Umphyrnai.
Ha ka jingialang, ki nongniah bad ki trai kali kit shyiap kit maw, kila rai ruh ba nym pdiang ia ka ain Meghalaya Minerals Preventions of Illegal Mining Transportation & Storage Rules, 2022.
Ki la kynnoh baka Sorkar Jylla kala pyntrei jubor ia kane ka ain, khlem ka mon u paidbah.
Naka liang u President ka kynhun Truck Owner and Driver Association u bah Egenstar Kurkalang ula ong “Ban ioh ia ka jingtrei ba laitluid, ngin ia kamai beit katba dang ioh u mar, ngim treh ia ka Challan namar kine ki mar kim dei kiba ngi shalan shabar Jylla hynrei ki dei ki mar ba ngi pyndonkam na bynta ka shnong bad ki jaka lajong bad wat ka sorkar ruh ka donkam ia kine ki mar jong ngi,”.
Dang shen ka kynhun jong ki trai kali bad nongniah kali hapoh ka Local Truck Owner and Driver Association ki la pynpaw ka jingbynniaw ia ka jingleh ka Sorkar jylla, lyngba ka Tnat Forest kaba la shu khang syndet ia ki Kali, ban kit ia ki maw ki shyiap ha kiba bun ki bynta jong ka East Khasi Hills District da kaba buh kyndon ba ki donkam ban leh da ki challan.
